سەنتەری بازرگانیی ئەرمینیا لە هەرێمی كوردستان دەكرێتەوە

ئاڤا نیوز

هەرێمی كوردستان و ئەرمینیا كار بۆ پێشخستنی ئاڵوگۆڕی بازرگانی نێوانیان دەكەن و بۆ یەكەمجاریش سەنتەری بازرگانیی ئەرمینیا لە هەرێمی كوردستان دەكرێتەوە.

 

چیرۆکی سەرەکی: ئەمڕۆ سێشەممە، کەمال موسلیم، وەزیری بازرگانی و پیشەسازی حكومەتی هەرێمی كوردستان، لەگەڵ کونسوڵی ئەرمینیا و ژمارەیەک لە خاوەن کۆمپانیاکانی ئه‌و وڵاته‌ کۆبووه‌وە و باسیان لە بەرەوپێشبردنی پەیوەندییە ئابووریی و بازرگانییەکانی نێوان ئەرمینیا و هەرێمی کوردستان کرد.

 

زانیاریی بەدەستهاتوو: وەزیری بازرگانی و پیشەسازیی حكومەتی هەرێمی كوردستان، نزیکبوونەوە و هەماهەنگيی نێوان بازرگانان و کۆمپانیاکانی ئەرمینیا و هەرێمی کوردستانی بە هەنگاوێکی پێویست زانی بۆ پێشخست و بەرزکردنەوەی ئاستی ئابووری و بازرگانيی نێوان هەردوولا.

لەلایەکی دیکە: كۆمپانیا ئەرمینیەكان باسیان لە كارو بەرهەمەكانیان لە بوارە جۆراوجۆرەكاندا كرد و بەبایەخەوە باسیان لە گونجاوی ژینگەی كار و ئابووریی كوردستان كرد، بەتایبەت لە پاڵپشتیكردنی وەبەرهێنەرانی بیانی.

زانیاریی زیاتر: تیمی وەزارەتی بازرگانی و پیشەسازی ڕوونکردنەوەی پێویستیان لەسەر ڕێکار و چۆنیەتی مامەڵەکردن لەگەڵ کارگە و کۆمپانیاکان، بۆ شاندە ئەرمینیەكە خستەڕوو، هەر لەو كۆبوونەوەیە بڕیار لەسەر کردنەوەی سەنتەری بازرگانيی ئەرمینیا لە هەرێمی كوردستان درا.