ئەمریکا ژمارەیەک پێگەی گرووپە چەکدارەکان لە سووریا بۆردومان دەکات

ئاڤا نیوز

 

وەک وەڵامێک بۆ هێرشکردنە سەر بنکەکانی لە ڕۆژئاوای کوردستان و باکووری سووریا، هێزەکانی ئەمریکا ژمارەیەک کۆگای چەک و تەقەمەنی گرووپە چەکدارەکانی لە سووریا بۆردومان کرد.

 

وێنە گەورەکە: ڕۆژی ڕابردوو بە دوو مووشەک هێرشکرایە سەر بنکەی شەدادی هێزەکانی ئەمریکا لە پارێزگای حەسەکەی ڕۆژئاوای کوردستان، ڕوانگەی سووریش ئاشکرایکرد کە ‌هێرشەکە لەلایەن گرووپەکانی نزیک لە ئێرانەوە ئەنجامدراوە.

 

لێدوانی فەرمی: فەرماندەیی ناوەندی ئەمریکا بڵاویکردەوە، لەکاردانەوەی هێرشەکەی سەر بنکەی شەدادی، ژمارەیەک کۆگای چەک و تەقەمەنی گرووپە چەکدارەکانیان لە سووریا کردووەتە ئامانج کە ئێران پشتیوانییان دەکات، هێرشەکەش بە ئامانجی کەمکردنەوەی توانای ئەو گرووپانە بووە بۆ ئەوەی نەتوانن هێزەکانی هاوپەیمانان لە سووریا بکەنەوە ئامانج.

 

ئەوەشی خستووەتەڕوو، وەڵامی هێرشێک دەدەنەوە کە بکرێتەسەر ئەندامان و هاوپەیمانەکانیان و پابەندیشن بە دانانی هەر ڕێکارێکی پێویست بۆ پاراستنی ئاسایشیان.