حووسییەكان: زیانی هێرشەكانی ئیسرائیل لە دەریای سوور 313 ملیۆن دۆلارە

ئاڤا نیوز

 

حوسییەكانی یەمەن ڕایدەگەیێنن، زیانی بۆردوومانەكانی ئیسرائیل بۆ سەر بەندەری ئەلحودەیدەی كەناراوەكانی دەریای سوور لە ڕۆژئاوای یەمەن، بە 313 ملیۆن دۆلار مەزەندە دەكرێت.

 

وێنە گەورەكە: لەوەتەی مانگی تەمموزی ئەمساڵەوە، ئیسرائیل هێرشەكانی بۆ سەر یەمەن و بەدیاریكراوی كەناراوەكانی ڕۆژئاوای ئەو وڵاتە و دەریای سوور چڕكردووەتەوە کە حووسییەكان كە لەو ناوچەیە باڵادەستن  زیانی گەورە بە ژێرخانی ئابووری بەندەرە بازرگانییەكان گەیشتووە.

 

ڕاگەیێنراوی فەرمی: حووسییەكان لە ڕاگەیێنراوێكدا ئاماژە بەوە دەكەن، ئۆپەراسیۆنە ئاسمانییەكانی ئیسرائیل جگە لە بەندەری حودەیدە، زیانی بە هەریەك لە كرێن و بەرزكەرەوەكانی بەندەرەكە و وێستگەی كارەبای ڕۆژئاوای یەمەن گەیاندووە، هاوكات جووڵەی كەشتیە بازرگانییەكانیش پەكی كەوتووە. 

 

ئەوەی پێویستە بیزانیت: ئەو بەندەرە بازرگانیانەی كەوتوونە گەرووی بەیەكگەیشتنی دەریاكان، بەگوێرەی بنەماكانی یاسای نێودەوڵەتی و پەیماننامەی نەتەوەیەكگرتووەكان، پێویستە لەكاتی شەڕ و ناكۆكییەكاندا پارێزراو بن و بەهیچ جۆرێك بەئامانج نەگیرێن، بەوپێیەی كاریگەری لەسەر جووڵەی بازرگانی جیهانی دەبێت.

 

باكگراوند: لەگەڵ دەستپێكردنی شەڕ لە كەرتی غەززە لە 7ـی ئۆكتۆبەری ساڵی 2023، حووسییەكانی یەمەن وەك لایەنگیری و پیشاندانی هاوسۆزیی بۆ حەماس بەرەیەكی شەڕیان لەدژی ئیسرائیل كردەوە و سەرەتاش سەرجەم ئەو كەشتیە بازرگانییە ئیسرائیلیانەیان بەئامانج دەگرت كە بە گەرووی بابولمەندەب لە دەریای سوور تێدەپەڕین، لەبەرامبەردا ئیسرائیل بە هاوكاری ئەمریكا و بەریتانیا جەنگی لەدژی حووسییەكان ڕاگەیاند.