ئاڤا نیوز هۆکاری دابەشنەکردنی مووچەی لیوا هاوبەشەکانی چەمچەماڵ ئاشکرا دەکات

ئاڤا نیوز 

 
بەشێک لە پێشمەرگەی لیوا هاوبەشەکانی قەزای چەمچەماڵ دژی دابەش نەکردنی مووچەکانیان ناڕەزایەتییان دەربڕی، قایمقامی چەمچەماڵیش لەوبارەیەوە دەڵێت 'پشووە و چاوەڕوانی فەرمانی وەزارەتی دارای و ئابوورین تا مووچە دابەش بکەین'.

 

وێنە گەورەکە: ئەمڕۆ 25-12-2024، بەشێک لە پێشمەرگەکانی سەر بە لیوا هاوبەشەکان لەپێش باڵەخانەی قایمقامیەتی چەمچەماڵ گردبوونەوە و ناڕەزایەتییان دەربڕی، وەک خۆیان دەڵێن، پێیان وتراوە ئەمڕۆ مووچەکانیان دابەش دەکرا، بەڵام بەبیانووی پشوو دواخراوە.

 

لێدوانی فەرمی: ڕەمک ڕەمەزان، قایمقامی چەمچەماڵ، بە ئاڤا میدیای ڕاگەیاند: قسەی ئەوانە ڕاستە، بەڵام ئەمڕۆ کراوە بە پشوو و ناتوانین مووچە دابەش بکەین، ئێستا لە هەوڵداین لەگەڵ بانکەکانی پارێزگای سلێمانی، چونکە کردنەوەی بانک فەرمانی وەزیر و وەزارەتی دارایی دەوێت، هەر کاتێک فەرمان بکات ئێمە ئامادەین مووچە دابەش بکەین، چونکە پارە لە بانک هەیە.

 

زانیاریی زیاتر: لە قەزای چەمچەماڵ تەنیا دوو بانک هەیە، ئەوانیش بانکەکانی چەرمۆ و چەمچەماڵن، لە هەر بانکێک زیاتر لە 15 هەزار مووچەخۆر هەیە.

 

ئەوەی پێویستە بیزانیت: زیاتر لە شەش هەزار کەسوکاری شەهید و ئەنفالکراو و زیندانی سیاسیی لە قەزای چەمچەماڵ مووچە وەردەگرن.