لەبارەی مووچەی خەڵکی کوردستان لە بە‌غدا کۆبوونەوەیەک دەکرێت

ئاڤا نیوز

شاندی حکومەتی عێراق کە لە هەولێر ڕاپۆڕتەکەیان لەبارەی بودجە و مووچە ئامادە کرد، ئەمڕۆ لە بەغدا لەگەڵ تەیف سامی کۆبوونەوە، شاندی کوردستانیش گەڕانەتەوە کوردستان.

وێنە گەورەکە: لە ڕۆژانی ڕابردوودا تیمێکی تەکنیکیی وەزارەتی دارایی هەرێمی کوردستان لە بەغدا بوو، بەڵام بەهۆی پشوو لە عێراق، لەگەڵ تەیف سامی کۆنەبوونەتەوە، ئامانج لە سەردانەکەیان چارەسەری کورتهێنانی مووچەی مانگی 11 و یەکلاکردنەوەی پرسی مووچەی مانگی 12 بوو.

لێدوانی فەرمی: سەرچاوەیەک لە وەزارەتی دارایی و ئابووریی حکومەتی هەرێمی کوردستان بە ئاڤا نیوزی ڕاگەیاند:

•    شاندی هەرێمی کوردستان گەڕاونەتەوە هەولێر، ئەو شاندەی عێراق کە لە هەرێمی کوردستان بوو، لە بەغدا لەگەڵ تەیف سامی، وەزیری دارایی عێراق کۆبوونەتەوە و  دەرئەنجامی کۆبوونەوەکانیان لە هەولێر بۆ خستووەتەڕوو.

•    ڕاپۆرت و یاداشتەکانی کۆبوونەوەی هەردوو  شاندەکە لە هەولێر براوەتە لای تەیف سامی و گفتۆگۆی لەسەر کراوە، چاوڕوانی ئەنجامی کۆبوونەوەن کە چ بڕیارێک دەدرێت بەتایبەت لەبارەی ناردنی پارەکەوە.

لەلایەکی دیکەوە: پێشتر ئاڤا ئاشکرای کردبوو کە تەیف سامی گوتوویەتی هیچ شتێک لای ئەو نەماوە، ڕەزامەندی کۆتایی خەرجکردنی 430 ملیار دیناری موناقەلە و مووچەی مانگی 12 لای محەمەد شیاع سودانییە و خۆی بڕیاری لەسەر دەدات.

باکگراوند: ڕۆژی 15-12-2024، بۆ گفتوگۆكردن سەبارەت بە پرسی مووچە، تیمی وەزارەتی دارایی عێراق و شاندی حکوومەتی هەرێمی كوردستان لە بەغدا كۆبوونەوە، وەزیری دارایی عێراق بڕیاری دا تیمێک لە وەزارەتەكەیەوە سەردانی هەولێر بکەن و لە ماوەی 10 ڕۆژدا بە هاوبەشی  کاری پێکەوەیی بکەن لەگەڵ بەڕێوەبەرایەتی گشتیی ژمێرکاری لە وەزارەتی دارایی هەرێمی كوردستان.