عێراق پێشوازیی لە ئاگربەستەکەی غەززە دەکات

ئاڤا نیوز

وەزارەتی دەرەوەی عێراق دەڵێت، پێشوازیی لە ئاگربەستەکەی غەززە دەکات و بەپێویستیشی دەزانێت بەخێرایی دەرفەت بڕەخسێنرێت تا هاوکاریی مرۆیی بگەیێنرێتە کەرتەکە، جەختیش لە مافی چارەنووسی فەڵەستینییەکان دەکاتەوە.

 

وێنە گەورەکە: ساڵێک و سێ مانگە شەڕ لە غەززە هەڵگیرساوە، بە نێوەندگیری ئەمریکا و میسر و قەتەر و دوای چەندین مانگ گفتوگۆ، شەوی ڕابردوو حەماس و ئیسرائیل بۆ ڕاگەیاندنی ئاگربەست گەیشتنە ڕێککەوتن، ئاگربەستەکە سێ قۆناغ لەخۆدەگرێت و هەر قۆناغێکیش 42 ڕۆژ دەخایەنێت.

 

ڕاگەیێنراوی فەرمی: وەزارەتی دەرەوەی عێراق لە ڕاگەیێنراوێکدا ئاماژەی بەوەشکردووە، دوای قوربانیدانی و نەهامەتی گەورەی فەڵەستینییەکان، پێشوازی لە ڕاگرتنی گرژییەکان لە غەززە دەکەن.

 

بەشێکی دیکە لە ڕاگەیێنراوەکەی وەزارەتی دەرەوەی عێراق: 

- پێزانینمان هەیە بۆ هەوڵەکانی ئەمریکا و میسر و قەتەر لەم بوارەدا کە ڕەنگدانەوەی هەماهەنگی نێودەوڵەتی بوو بۆ ڕاگرتنی نەهامەتییەکان و گەرەنتی پاراستنی ئاسایشی ناوچەکە.

 

- جەخت لە چڕکردنەوەی هەوڵە نیودەوڵەتییەکان دەکەینەوە بۆ دووبارە ئاوەدانکردنەوەی ناوچە خاپووربووەکان، تا دانیشتووانەکەی بتوانن بگەڕێننەوە.

 

- جەخت لە مافی گەلی فەڵەستین دەکەینەوە بۆ دیاریکردنی مافی چارەنووس، بەو شێوەیەی کە لە پێناویدا خەباتی بۆ کردووە.