بە بەشداری مەسرور بارزانی کۆڕبەندی ئابووریی داڤۆس دەستپێدەکات

ئاڤا نیوز

وا بڕیارە سبەی بە بەشداری زیاتر لە 360 سەرکردە و 60 سەرۆکی وڵاتانی جیهان کۆڕبەندی داڤۆس لە سویسرا دەستپێبکات. سەرۆکوەزیران مەسرور بارزانیش بەشداری لە کۆڕبەندەکە دەکات.

وێنە گەورەکە: کۆڕبەندی داڤۆس لە ساڵی 1971 لەلایەن ئابووریناسێکی ئەڵمانی کلاوس شوابەوە دامەزراوە، وەک کۆڕبەندی بازرگانی ئەوروپی دەستیپێکرد، کە سەکۆیەک بوو بۆ گفتوگۆ لەنێوان سەرکردە سیاسی و بازرگانی و ئەکادیمییەکان.

چیرۆکی سەرەکی: بۆ ئەمساڵ کۆڕبەندەکە لەژێر تەوەری "هاوکاری بۆ سەردەمێکی زیرەک"، بەڕێوەدەچێت و پێشوازی لە سێ هەزار بەشداربوو لە 130 وڵاتی جیهانەوە دەکات، لە نێویاندا هەزار و 600 بەڕێوەبەری جێبەجێکار و کەسایەتیی بازرگانی، پێکەوە، تاوتوێی چارەسەری هەندێک لە ئاستەنگە هەرە دیارەکانی جیهان دەکەن، وەک ململانێکان لە ڕۆژهەڵاتی ناوەڕاست، قەیرانی غەززە و سووریا تا گۆڕانی کەشوهەوا و دوای ئاگرکەوتنەوە وێرانکارەکەی کالیفۆرنیا.

خاڵی ئەرێنی: کورد لە داڤۆس ئامادەییەکی کارای هەیە، سەرۆکوەزیران مەسرور بارزانی، وەک کەسایەتییەکی سەرەکی لە داڕشتنی گفتوگۆ ئابووری و ئەمنییەکان ئامادە دەبێت، بەشداریکردنی بەردەوامی هەرێمی کوردستان تیشک دەخاتە سەر ڕۆڵی گەشەسەندنی هەرێمی کوردستان لەسەر شانۆی جیهان.

زانیاریی زیاتر: لە کۆڕبەندەکە سەرۆکە دیارەکانی وەک دۆناڵد ترەمپ سەرۆکی ئەمریکا، ئورسولا ڤۆن دێر لیین سەرۆکی کۆمسیۆنی ئەوروپا و ئۆلاف شۆڵتز، ڕاوێژکاری ئەڵمانیا و ڤۆلۆدیمێر زیلینسکی، سەرۆکی ئۆکراینا، عەبدولەتیف ڕەشید، سەرۆککۆماری عێراق، ئەسعەد حەسەن ئەلشیبانی، وەزیری دەرەوەی سوریا، سەردێڕی گفتوگۆکانی ئەمساڵ دەبن.

بۆچی گرنگە: نزیکەی 15  ساڵە هەرێمی کوردستان بەشدارێکی بەردەوامی داڤۆس بووە، دوو ساڵ لەمەوبەر کردنەوەی ماڵی کوردستان لە پەراوێزی کۆڕبەندەکە، جێگەی خۆی وەک بەشدارێکی گرنگ لە هاوکاری نێودەوڵەتی و گەشەپێدانی ئابووریی چەسپاندووە. بەدرێژایی ڕۆژانی کۆڕبەندەکە لەم ماڵەدا دەیان کۆبوونەوە و دیداری گرنگی سیاسی و ئابووری لەگەڵ سیاسەتمەدار و بارزگان و گەورە وەبەرهێنەرانی جیهان بەڕێوەدەچێت.

 

ئەوەی پێشبینی دەکرێت: لە کۆڕبەندی ئەمساڵ چاوەکان لەسەر ئەوەن، سەرکردەکانی جیهان کلیلی چارەسەری تەنگە سیاسی و ئابوورییەکان بدۆزنەوە، لەگەڵ ئەوەدا بگەڕێن بۆ جیهانێکی زیرەکتر و پەیوەندیدارتر، چونکە ئەو ئاڵنگارییانەی ئەمڕۆ ڕووبەڕوومان دەبنەوە داوای هاوکاریی زیاتر لە سنوورە جیاوازەکان دەکەن.