دوای ئاگربەست 300 هەزار فەلەستنی گەڕاونەتەوە بۆ باکووری غەززە

ئاڤا نیوز 

 

دوای ئەوەی ڕێوڕەوەکان بەڕووی فەلەستینییەکان کرانەوە، 300 هەزار فەلەستنی بەرەو باکووری غەززە گەڕانەوە. 

 

چیڕۆکی سەرەکی: ساڵێک و سێ مانگە شەڕ لە کەرتی غەززە هەیە و بەهۆیەوە هەزاران فەلەستنی ناچاربوون ماڵەکانیان بەجێبهێڵین و ئاوارەبوون و هەزاران کەسیش بەهۆی هێرشەکانی ئیسرائیلەوە کوژران، دواجار بە ڕەزامەندی هەر یەکە لە ئیسرائیل و حەماس ئاگربەست ڕاگەیێنرا و ئێستا کاری پێدەکرێت.

 

چی ڕوودەدات: لە 27-1-2025 بەهەزاران هاووڵاتی غەززە دەستیانکرد بەگەڕانەوە بۆ ناوچەکانی خۆیان لە باکووری کەرتی غەززە، ئەمەش لە چواچێوەی ڕێککەوتنی قۆناغی یەکەمی ئاگربەستە لە غەززە ئاوارەکان لە شەقامی ڕەشید لە ڕێگەی خاڵی پشکنینی ڕۆژئاوای نەتسەریم بۆ شاری غەززە و  باکووری کەرتی غەززە گەڕانەوە.

 

ڕاگەیێنراوی فەرمی: نووسینگەی ڕاگەیاندنی حکومی لە غەززە ڕایگەیاند، زیاتر لە 300 هەزار ئاوارە لە باشوور و ناوەندی کەرتی غەززەوە بەرەو باکوور گەڕاونەتەوە.

 

زانیاریی زیاتر: یەکێک لە بنەماکانی ئاگربەستی غەززە لە چوارچێوەی قۆناغی یەکەمدا ڕێگەدانە بە گەڕانەوەی هاووڵاتیان بۆ باکووری غەززە، دواجار نووسینگەی بنیامین نەتانیاهۆ سەرۆکوەزیرانی ئیسرائیل ڕایگەیاند کە ڕێڕەوەکان بەڕووی فەلەستینییەکان کرانەوە و دەتوانن بگەڕێنەوە باکووری غەززە.