خانەنشینانی نوێ 18 مووچەیان بۆ خەرج دەکرێت

ئاڤا نیوز

بەگوێرەی ڕێنمایی خانەنشینی لە عێراق، ئەو سێ تەمەنەی لەو ماوەیە خانەشین دەبن و سەرووی 25 ساڵ خزمەتیان هەیە، دەبێت 18 مووچەیان بۆ خەرج بکرێت کە شەشیان مووچەی بنەڕەتی و 12 ـیان مووچەی خانەنشین بوونیانە.

وێنە گەورەکە: ڕۆژانە سەدان خانەنشین کە تەمەنیان سەرووی 60 ساڵییە مامەڵەی دەستلەکارهەڵگرتن دەکەن، سەرجەمیان شەش مووچە بە مووچەی بنەڕەتی لەو دامەزراوەیە وەردەگرن کە خزمەتی وەزیفیان تێیداکردووە، لە عێراق ئەوانەی خانەنشین دەبن و خزمەتیان زیاترە لە 25 ساڵ، 12 مووچەی دیکەیان بە مووچەی خانەنشینی بۆ خەرج دەکرێت، کە ئەمە دەبێت لە هەرێمی کوردستانیش جێبەجێ بکرێت.

مووچەکان چۆن وەردەگیرێت:

هەر فەرمانبەرێک کە خانەنشین دەبێت 6 مووچە لە فەرمانگەکەی خۆی وەردەگرێت، 12 مووچەکەی تر بەڕیوەبەرایەتی خانەنشین پێیدەدات، بەو مەرجەی 180 ڕۆژ مۆڵەتی کۆکراوەی هەبێت لە کۆی خزمەتەکەی کە 25 ساڵە.

زانیاریی تایبەت: سەرچاوەیەک لە بەڕێوەبەرایەتیی خانەنشینیی سلێمانی بە ئاڤای گوت، "خەرجکردنی 18 مووچە تەنیا ئەو سێ تەمەنە (60، 61 و 62) دەگرێتەوە کە ئەم ماوەیە بڕیاری خانەنشینبوونیان دراوە، ئەمەش پێویستی بە ڕەزامەندی وەزارەتی دارایی عێراق هەیە بۆ تەرخانی پارەکە بۆئەوەی بۆیان خەرج بکرێت."

زانیاریی زیاتر: ئەو فەرمانبەرانەی خزمەتیان کەمترە لە 25 ساڵ، تەنیا شەش مووچەی بنەڕەتی لە فەرمانگەکەیان وەردەگرن و لەو 12 مووچەیەی لە خانەنشینی خەرجدەکرێت سوودمەندنابن.