عێراق کۆمەڵێک پارچە شوێنەواری دزراو لە ئیتاڵیا وەردەگرێتەوە

ئاڤا نیوز

لەچوارچێوەی گەڕاندنەوەی شوێنەوارە دزراوەکانی، عێراق کۆمەڵێک پارچە شوێنەوار لە ئیتاڵیا وەردەگرێتەوە.

چیرۆکی سەرەکی: لەچوارچێوەی دیپلۆماسییەتی گەڕاندنەوەی شوێنەوارەکان، باڵیۆزخانەی عێراق لە ئیتاڵیا دەسەڵاتدارانی ئەو وڵاتەی ئاگادار کردووەتەوە لەوەی چەندین پارچە شوێنەواری گوماناوی لە مەزادخانەیەک لە باکوری شاری میلانۆ نمایشکراوە، هاوکات یەکەی کارابینێری کە تایبەتە بە بەرەنگاربوونەوەی قاچاخچێتی پارچە شوێنەوار، دەستی بەسەر پارچەکاندا گرتووە و قاچاخچییەکانیشی دەستگیر کردووە.

لێدوانی فەرمی: میشێل مینیتی، فەرماندەی یەکەی پاراستنی کەلتووری و ڕۆشنبیری کارابینێری ئیتاڵی ڕایگەیاند: دوای ئەوەی پشکنینی چڕ بۆ پارچە شوێنەوارەکان لەلایەن پسپۆری تایبەتەوە کراوە،  دەرکەوتووە سەرجەم ئەو پارچە شوێنەوارانە تایبەتە بەکەلتوور و شوێنەواری عێراقەوە و لەوێشەوە بەقاچاخ هێنراوەتە ئەوروپا.

ئەوەی پێویستە بیزانیت: بڕیارە لە داهاتوویەکی نزیکدا ئەو پارچە شوێنەوارانە بگوازرێنەوە بۆ بەغدا و ڕادەستی  مۆزەخانەی نیشتمانی عێراق بکرێنەوە.

ئەمەش بزانە: لە سێ ساڵی ڕابردوودا حکومەتی عێراق توانیویەتی زیاتر لە 24 هەزار پارچە شوێنەوار کە بۆ دەرەوەی وڵات بردرابوون، بگەڕێنێتەوە.