جووتیارانی کوردی ناوچە جێناکۆکەکان لە بڕیاری دادگای فیدراڵی نیگەرانن

ئاڤا نیوز

 

جووتیارانی ناوچەکانی دەرەوەی ئیدارەی هەرێمی کوردستان لە بڕیاری دادگای فیدراڵی نیگەرانن کە کارکردنی بە یاسای گەڕاندنەوەی ماڵ و موڵکی داگیرکراو کە لەلایەن ئەنجوومەنی نوێنەرانەوە پەسەند کرا، ڕاگرت.

 

چیرۆکی سەرەکی: دوای دەیان ساڵ لە هەڵوەشاندنەوەی بڕیارەکانی ئەنجوومەنی باڵای شۆڕشی بەعس، جووتیارانی کورد و تورکمانی ناوچەکانی دەرەوەی ئیدارەی هەرێم ئاهێکیان بە بەردا هاتەوە، بەڵام ڕاگرتنی جێبەجێ کردنی یاساکە لە لایەن دادگای فیدڕاڵییەوە، جارێکیتر جووتیارانی نیگەران کردەوە.

 

لێدوانی تایبەت: هاووڵاتییانی کوردی ناوچەکانی دەرەوەی ئیدارەی هەرێم بە بڕیارەکەی دادگای فیدراڵی نیگەرانن و دەڵێن: "ئەمە زەوی ئێمەیە و لەسەری ژیاوین، چیبکەین ئەگەر زەوییەکانمان ببەن، بەچی بژین، مرۆڤ لە پاش نامووسی خاکەکەی دێت، خاک لای ئێمە پیرۆزە".

 

لەلایەکی دیکە: سوپای عێراق ئەم بڕیارەی دادگای فیدڕاڵی قۆستوەتەوە و دەستی کردووەتەوە بە ڕێگریکردن لە جووتیاران و داوایان لە جووتیارانی تورکمانی گووندی بڵاوە کردوە زەوییە کشتوکاڵییەکانیان جێ بهێڵن.

 

زانیاریی زیاتر: ئیدارەی کەرکووک لە چاوەڕوانی بڕیاری دادگای فیدڕاڵی و دەرکردنی مەرسومی کۆماریدایە تا دەست بکات بە گەڕانەوەی زەوییە کشتوکاڵییەکان بۆ خاوەنە ڕەسەنەکانیان کە جووتیارانی کورد و تورکمانن.

 

ئەوەی پێویستە بیزانیت: تا یەکلاییکردنەوەی سکاڵاکان و بڕیاری کۆتایی دادگای فیدڕاڵی پێناچێت ئەم بابەتە هێندە بە ئاسانی یەکلایی بێتەوە، ئەمەش وادەکات جارێکی دیکە سوپا ڕێگریی بکات لە کێڵان و بەکارهێنانی زەوییە کشتوکاڵییەکان لە لایەن جووتیارانی کورد و تورکمان.