پارەی کارمەندانی کۆمیسیۆن لە سنووری هەولێر دابەش دەکرێت

ئاڤا نیوز

هەفتەی ڕابردوو لە دهۆک دەست بەدابەشکردنی شایستە داراییەکانی کارمەندانی سەر سندووق کرا، نزیکەی 11 هەزار کارمەندی سەر سندووق لە هەڵبژاردنی خولی شەشەمی پەرلەمانی کوردستان لە نزیکترین بانک بەگوێرەی شوێنی جوگرافی پارەکە وەردەگرن، لە هەولێریش پرۆسەکە گەیشتووەتە قۆناغی کۆتایی و دەست بەدابەش کردنی دەکرێت.

چیرۆکی سەرەکی: پارەی 41 هەزار کارمەندی کۆمیسیۆن خراوەتە سەر هەژماری بانکی لقەکانی کۆمیسیۆن، لە ئۆفیسی پارێزگاکانی هەرێمی کوردستان پێکهێنانی لیژنەی سەرپەرشتی و دابەشکردنی پارەکە بەسەر بانکەکان بەردەوامە، لەماوەی چەند ڕۆژی داهاتوو 15 هەزار کارمەندی کۆمیسیۆن پارەکەیان لە 23 بانک  خەرج دەکرێت.

لێدوانی فەرمی: ئەحمەد مازن، وتەبێژی ئۆفیسی هەولێری کۆمیسیۆنی هەڵبژاردنەکانی عێراق بۆ ئاڤا گوتی: "هەموو ڕێکارێک تەواو بووە و تەنیا پێداچوونەوەی خێرای وردەکارییەکان ماوە و سێ ملیار دینار تێچووی کارمەندانی کۆمیسیۆن ئامادەیە، دوای تەواوبوونی ئەو پێداچوونەوەیە کارمەندانی کۆمیسیۆن دەتوانن لە نزیکترین بانک لە شوێنی جوگرافیان پارەکە وەرگرن.

زانیاریی زیاتر: پارەی کارمەندەکان بە پێی ئەرک و بەرپرسیارییەتیان لە رۆژی هەڵبژاردن دابەش دەکرێت بەم شێوەیە:

- مونەسقی بنکە 350 هەزار

- بەڕێوەبەری وێستگە ئەگەر فەرمانبەر بێت 150 هەزار و سوپاس و پێزانینێک کە پلە بەرزکردنەوەی دێنێتە پێش. ئەگەر فەرمانبەر نەبێت 250 هەزار وەردەگرێت.

- کارمەندانی یەدەگ 100 هەزار دیناریان بۆ خەرج دەکرێت.