هەڵوێستی هەژماری من لەبارەی بڕیارەکەی دادگای فیدراڵی: پێشوازی لێدەکەین

ئاڤا نیوز

 

تیمی هەژماری من ڕاگەیێنراوێكی سەبارەت بە بڕیاری ئەمڕۆی دادگەی فیدڕاڵیی عێراق كە  پەسەندی ئەو بنەما سەرەكییانە دەكات كە پڕۆژەی هەژماری من پەیڕەوی دەكات, بڵاوكردەوە و دەڵێت، پێشوازیی لە بڕیارەكەی دادگەی فیدڕاڵی دەكەین.

 

چیرۆكی سەرەكی: ئەمڕۆ سێشەممە 18-2-2025، دادگەی باڵای فیدراڵی بڕیاری دا پرۆسەی تەوتینکردنی مووچەی فەرمانبەرانی هەرێمی کوردستان جێبەجێ بکرێت و دەبێت بەپێی ڕێکكارەکانی بانکی ناوەندی بێت، بەمەش پەسەندی پڕۆژەی هەژماری من دەكات.

 

ڕاگەیێنراوی فەرمی: تیمی هەژماری من ڕایگەیاند: پێشوازی لە بڕیارەکەی ئەمڕۆی دادگای فیدڕاڵی عێراق دەکەین كە دووپاتی کردووە کە بە بانکیکردنی مووچەی فەرمانبەرانی هەرێمی کوردستان دەبێت بەپێی ڕێکارەکانی بانکی ناوەندی بێت، لەلایەن بانکە مۆڵەتپێدراوەکانی بانکی ناوەندی ئەنجام بدرێت، و هەروەها فەرمانبەر سەرپشک بکرێت لە هەڵبژاردنی بانکی دڵخوازی خۆی لەو بانکانەی ڕەزامەندی بانکی ناوەندییان هەیە کە هەموو ئەمانەش یەکدەگرنەوە لەگەڵ بنەما سەرەکییەکانی پڕۆژەی هەژماری من.

 

ئەوەی پێویستە بیزانیت: لەبارەی کۆبوونەوەکانیان لەگەڵ وەزارەتی دارایی فیدراڵ لە ڕاگەیێنراوەکەی هەژماری من هاتووە، "تیمەکەمان وەک بەشێک لە شاندی حکومەتی هەرێمی کوردستان، سەرەتای ئەم مانگە لەگەڵ وەزارەتی دارایی عێڕاق کۆبوونەتەوە و نوێترین پێشهاتەکانی پڕۆژەکەیان بۆ باسکردوون وەک چۆن لە بڕیارەکەی دادگای فیدڕاڵیشدا هاتووە و ئەم هەماهەنگییەش بەردەوام دەبێت لەڕێگەی ناردنی زانیاریی و پێشهاتی مانگانە بۆیان".

 

زانیاریی زیاتر: "بەردەوام دەبین لە هەماهەنگی نزیکمان لەگەڵ بانکی ناوەندی عێراق، بەوپێیەی بە بانکیکردنی مووچە هەنگاوێکی گرنگ دەبێت بۆ تەواوی هەرێمی کوردستان و عێراق." هەژماری من وادەڵێت.