دادگای فیدراڵی یاساییبوونی پڕۆژەی هەژماری من دووپات دەکاتەوە

 

ئاڤا نیوز

دادگای فیدڕاڵی عێراق سەبارەت بە بانکیکردنی مووچەی فەرمانبەران پەسەندی ئەو بنەما سەرەكییانە دەكات كە پڕۆژەی هەژماری من پەیڕەوی دەكات.

چیرۆکی سەرەکی: ڕۆژی سێشەممە، دادگای باڵای فیدڕاڵی بڕیاری دا پرۆسەی بەبانکیکردنی مووچەی فەرمانبەرانی هەرێمی کوردستان جێبەجێ بکرێت و دەبێت بەپێی ڕێکكارەکانی بانکی ناوەندی بێت، ئەم هەنگاوەش پەسەندی پڕۆژەی هەژماری من دەكات.

 

 

زانیاریی زیاتر: بە گوێرەی بڕیارەکانی دادگای فیدڕاڵی، دەردەکەوێت پڕۆژەی هەژماری من بەیاسایی کراوە، لە بەر ئەم سێ خاڵە:-

٠ پرۆسەی بەبانکیکردنی مووچەخۆران بەپێی ڕێکارەکانی وەزارەتی دارایی هەرێمی کوردستان و وەزارەتی دارایی فیدڕاڵی بەردەوام دەبێت، واتا بە دروستکردنی هەژماری بانکی لە هەژماری من.

٠ پرۆسەی بەبانکیکردنەکە لە بانکە مۆڵەت پێدراوەکانی بانکی ناوەندی دەبێت، هەموو بانکەکانی نێو پڕۆژەی هەژماری من مۆڵەتی بانکی ناوەندییان هەیە.

٠ مووچەخۆر سەرپشکە لەوەی کامە بانک هەڵدەبژێرێت، لەو بانکانەی لە چوارچێوەی هەژماری من تۆمارکراون.

ئەمەش بزانە: بەگوێرەی دوایین داتای تیمی هەژماری من، 720 هەزار فەرمانبەر خۆیان لە نێو پرۆسەکە تۆمارکردووە و 370 هەزاریان کارتیان وەرگرتۆتەوە، بۆ مووچەی مانگی یەک 275 هەزار فەرمانبەر و خانەنشین لە ڕێگەیەوە مووچەکانیان وەرگرت.