لەبارەی سەلامەتیی ناوچە گەشتیارییەكانی سۆران دڵنیایی دەدرێت

ئاڤا نیوز

 

گەشتوگوزاری سۆران دڵنیایی دەدات لەوەی ناوچە گەشتیارییەكانی دەڤەری سۆران سەلامەتن و ئەگەری ڕوودانی تەقینەوەی مین بەو شێوەیە نییە كە بەشێك لە پەیج و دەزگا ڕاگەیاندنەكان بانگەشەی دەكەن.

 

وێنە گەورەكە: لە چەند ڕۆژی ڕابردوودا بەشێك لە پەیج و دەزگا میدیاییەكان، باسیان لە هەبوونی چەندین كێڵگەی مین لە سنووری ئیدارەی سۆران كرد و وەهایان نیشاندا كە چەندەها كارەساتی نەخوازراوی لێ كەوتووەتەوە.

 

ڕاگەیێنراوی فەرمی: بەشی ڕاگەیاندن و بەبازاڕكردن لە بەڕێوەبەرایەتیی گشتیی گەشتوگوزاری سۆران ڕوونكردنەوەیەكی بڵاوكردووەتەوە و ئاماژەی بەوەكردووە، "ئیدارەی سۆران ڕووبەرێكی فراوانی گەشتیاریی هەیە كە هەر چوار وەرزی ساڵ، ژمارەیەكی زۆری گەشتیاری بیانی و ناوخۆیی سەردانی دەكەن، تائێستا هەبوونی كێڵگە مینییەكان نەبووەتە سەرچاوەی هەڕەشە و مەترسی بۆ گەشتیاران كە شایانی باسكردن بێت."

 

ئەوەی پێویستە بیزانیت: گەشتوگوزاری سۆران ڕوونیدەكاتەوە، ئیدارەی سۆران ڕووبەرێكی بەرفراوانی هەیە كە نزیكەی 30%ـی كۆی ڕووبەری هەرێمی كوردستان پێكدەهێنێت، بێگومان لە سنوورێكی وەها فراوانیش كە هەڵكەوتەی جوگرافییەكەی شاخ و دۆڵ و ڕووباری لەخۆگرتووە، ئەگەری ڕوودانی چەند حاڵەتێكی تەقینەوەی مین پێشبینیكراوە، ئەوەش بەهۆی گوێنەدانی بەشێك لە گەشتیار و سەردانیكاران بە ڕێنماییەكانی لایەنی پەیوەندیدار.

 

كاریگەری و لێكەوتەكان: گەشتوگوزاری سۆران دەشڵێت، بە بڵاوكردنەوەی هەواڵی ناڕاست بەبێ لەبەرچاوگرتنی بایەخی كەرتی گەشتیاریی سۆران كە سەرچاوەیەكی گرنگی داهاتە بۆ هەرێمی كوردستان، ڕەنگدانەوەی پێچەوانەی دەبێت لەسەر پێشخستنی سێكتەری گەشتیاری لە دەڤەرەكە كە لە خاڵە سەرەكییەكانی كارنامەی حكومەتی هەرێمی كوردستانە.