سەرۆکی میسر داوای دووبارە بوونیادنانەوەی غەززە دەکات

ئاڤا نیوز

 

عەبدولفەتاح سیسی، سەرۆککۆماری میسر داوا دەکات دەست بەبوونیادنانەوەی غەززە بکرێتەوە، بەڵام بەبێ ئاوارەبوونی فەلەستینییەکان.

 

چی ڕوودەدات: لەمیانی کۆبوونەوەیەکی عەبدولفەتاح سیسی، سەرۆککماری میسر لەگەڵ دوبراڤکا سویکا، کۆمیساری یەکێتیی ئەوروپا باس لە پێشهاتەکانی غەززە کران  و جەخت لە هەماهەنگی و خستنەگەڕی هەوڵەکان کرایەوە بۆ ئاشتی و سەقامگیری لە غەززە.

 

لێدوانی فەرمی: عەبدولفەتاح سیسی، سەرۆککۆماری میسر ڕایگەیاند، پێویستە دەست بە پرۆسەی ئاوەدانکردنەوەی کەرتی غەززە  بکرێت بەڵام بەبێ ئاوارەبوونی فەلەستینیەکان.

 

بۆچی گرنگە: میسر یەکێکە لە نێوەندگیرانی ئاگربەستی غەززە لەنێوان ئیسرائیل و حەماس، دۆناڵد ترەمپ، سەرۆکی ئەمریکا پێشنیازی ڕاگواستی دانیشتووانی غەززەی بۆ میسر و ئوردن کرد، بۆ ئەم بابەتەش لووتکەی عەرەبی لە قاهیرە لەم هەفتەیە بەڕێوەدەچێت و پێشهاتەکانی غەززە و پێشنیازی ترەمپ تاوتوێ دەکرێت.

 

باکگراوند: دوای دەستبەکاربوونی، ترەمپ پلانی چۆڵکردن و ڕاگواستنی دانیشتووانی کەرتی غەززەی خستەڕوو، بۆ ئەم مەبەستەش داوای لە میسر و ئوردن کرد فەلەستینییەکانی نیشتەجیێی غەززە بگوازنەوە وڵاتەکانیان، بەڵام هەردوو وڵات ئەم پێشنیازەی ترەمپیان ڕەتکردەوە.