سەدان خانەنشین بۆ وەرگرتنی مووچەی مانگی شوبات ناویان دەگەڕێتەوە

ئاڤا نیوز

زیاتر لە 25 هەزار مووچەخۆر فۆرمی خانەنشینیان پڕکردووەتەوە، ئەو مانگە ناوی بەشێکیان بۆ وەرگرتنی مووچە دەگەڕێتەوە.

وێنە گەورەکە: بەهۆی پەیڕەوکردنی یاسای خانەنشینی یەکگرتوو، بەشێک لە خانەنشینانی هەرێمی کوردستان تاوەکو ئێستا ناویان لە لیستی مووچە جێگیر نەکراوە.

زانیاریی بەدەستهاتوو: سەرچاوەیەک لە بەڕێوەبەرایەتیی گشتیی خانەنشینی کوردستان بە ئاڤا میدیای ڕاگەیاند: بەشێکی ئەو خانەنشینانەی فۆرمیان پڕکردووەتەوە و خانەنشینییەکەیان وەرنەگرتووە، بۆ مووچەی مانگی دوو لە وەرگرتنی مووچەی خانەنشینییەکەیان سوومەند دەبن.

زانیاریی زیاتر: ئاڤا میدیا زانیویەتی بۆ مووچەی مانگی سێ، سەدان خانەنشینی دیکە ناوەکانیان لە لیستی مووچەدا دەبێت و خانەنشینییەکەیان وەردەگرن.

ئەوەی پێویستە بیزانیت: پێشتر مەریەم عوسمان، بەڕێوەبەری گشتیی خانەنشینی کوردستان بە ئاڤا میدیای گوت: 291 هەزار و 670 کەس لە خانەنشینی مەدەنی، سەربازی و پێشمەرگە لە هەرێمی کوردستان خانەنشین کراون، هاوکات ئەمساڵیش زیاتر لە 25 هەزار مووچەخۆر خانەنشین بوون.