ئاڤا هۆكاری دەركەوتنی كلكە هەڵمی فڕۆكەكان لە ئاسمانی كوردستان ئاشكرا دەكات

ئاڤا نیوز 

 

پسپۆڕێکی فەلەکناسی دەنگۆی بڵاوکردنەوەی ماددەی ژەهراوی و دەستکاریکردنی کەشوهەوای ئاسمانی هەرێمی کوردستان ڕەتدەکاتەوە و دەڵێت، زۆربوونی ئەو دیاردەیە بۆ ئەوە دەگەڕێتەوە کە ئاسمانی هەرێمی کوردستان بووەتە هێڵی سەرەکیی هاتووچۆی فرۆکەکان لەنێوان ئەوروپا و وڵاتانی کەنداو.

 

وێنە گەورەکە: ماوەیەکە هێڵی هەڵمی تێپەڕبوونی فڕۆکە لە ئاسمانی هەرێمی کوردستان زیاتر لە جاران دەردەکەوێت و بەشێک لە بەکارهێنەرانی تۆڕە کۆمەڵایەتییەکانیش دەنگۆی ئەوەیان بڵاوکردەوە گوایە فرۆکەکان سەرقاڵی دەردانی گازی ژەهراوین لە ئاسمانی هەرێمی کوردستان بۆ ئەوەی کەشوهەوا بگۆڕێت.

 

لێدوانی فەرمی: لوقمان حەوێز، پسپۆڕی فەلەکناسی و دیاردە گەردوونییەکان لە ناوەندە زانستییەکانی ئەمریکا تایبەت بە ئاڤا ڕایگەیاند، بڵاوکردنەوەی ئەو دەنگۆیانە بۆ بەلاڕێدابردنی بابەتەکانە، ئەو هێڵە هەڵمیانە لە بزوێنەری فڕۆکەکان دەردەچن ئاوێتەیەکی هایدرۆکاربۆنییە و بەرهەمی سووتاندنی سووتەمەنی فرۆکەیە و دیاردەیەکی زۆر ئاسایی و بێ زیانە.

 

ئەوەی پێویستە بیزانیت: سووتەمەنی فرۆکە کە ئاوێتەیەکی هایدرۆکاربۆنییە، لە ئەنجامی سووتانیدا هەڵمی ئاو و گازی دووەم ئۆکسیدی کاربۆن دەردەدات، ئەگەر لەو چینـە بەرزەی بەرگەهەوا ڕێژەیەکی گونجـاوی شێ بوونی هەبێت، یەکسەر هەڵمەکە دەبێتە هەور و لەوانەیە بۆ چەند کاتژمێرێکیش بمێنێتەوە و بڵاوببێـتەوە. ئەم ماوەیـەش لەبـەر بارودۆخـی سـووریا و لوبنـان زۆربەی ئەو فڕۆکانـەی کە لە ئەوروپـاوە بەرەو کەنـداو هەڵدەفڕن، بەسەر ئاسـمانی کوردسـتان و عێـراقدا دەڕۆن بۆیە ئەو دیاردەیـە ماوەیەکە زیاتر دەبینرێت.