ئاماری کوژراوانی پێکدادانەکانی سووریا بۆ زیاتر لە 500 کەس بەرزر دەبێتەوە

ئاڤا نیوز

دوای 48 کاتژمێر لە پێکدادان و هێرشی چەکداری لەنێوان هێزەکانی سوپا و پاشماوەکانی ڕژێمی پێشوو، ئارامییەکی ڕێژەیی بۆ کەناراوەکانی سووریا گەڕاوەتەوە. لەو ماوەیەشدا تاوەکو ئێستا زیاتر لە 500 کەس لە هاووڵاتیانی سڤیل و هێزە چەکدارەکان کوژراون.

 

وێنە گەورەکە: ماوەی سێ ڕۆژە شەڕ و پێکدادانەکان لە نێوان سوپای سووریای نوێ و پاشماوەی چەکدارانی سەر بە بەشار ئەسەد لە لازقییە بەردەوامە و تاوەکو ئێستا بە هۆیەوە بە دەیان کەس کوژران.

 

لێدوانی فەرمی: ڕامی عەبدولڕەحمان، بەڕێوەبەری ڕوانگەی سووری بۆ مافەکانی مرۆڤ ڕایگەیاند: لانیکەم تا ئێستا کوژرانی 304 هاووڵاتی سڤیل لە ناوچەکانی بانیاس، جەبلە و دەورووبەری، قەرداحە و لازقییە دۆکیومێنت کراون، جگە لە بوونی زانیاریی سەبارەت بە کۆمەڵکوژیی دیکە کە لە چەند کاتژمێری داهاتوودا بە دیکۆمێنت دەکرێن.

 

زانیاریی بەدەستهاتوو: بە گوێرەی ئامارەکانی ڕوانگەی سووری بۆ مافەکانی مرۆڤ، ئاماری کوژراوەکان لە ڕیزەکانی سوپا و پاشماوەکانی ڕژێم و خەڵکی سڤیل بەرزبووەتەوە.

 

ژمارەکان وادەڵێن: ژمارەی قوربانیان لە ماوەی 48 کاتژمێری ئەو شەڕەی کە لە کەناراوەکانی سووریا سەریهەڵدا بۆ 213 کەس لە ڕیزەکانی سووپا و گرووپە چەکدارەکان بەرزبووەتەوە، ڕەنگە ژمارەکە زیاتریش بەرز ببێتەوە.

 

- ژمارەی کوژراوان لە ڕێزەکانی وەزارەتی بەرگریی و ناوخۆی سووریا بەرزبووەوە بۆ 93 چەکدار.

- ژمارەی کوژراوان لە پاشماوەکانی ڕژێم بۆ 120 کەس بەرزبووەتەوە.

 

لەلایەکی دیکەوە: پێشتر ڕوانگەی سووری ڕایگەیاندبوو زیاتر لە 155 هاووڵاتی سڤیل لەسەر دەستی هێزەکانی ئاسایشی ناوخۆ و وەزارەتی بەرگریی لە پارێزگای لازقییە گوللـەباران کراون.