دابەشکردنی مووچە لەڕێگەی هەژماری من خێراتر دەکرێت

ئاڤا نیوز

ئەو مووچەخۆرانەی هەژماری منیان هەیە، ڕۆژێک زووتر لە خشتەی دیارکراو بەپێی وەزارەتەکان مووچەیان دەخرێتە سەر هەژمارەکەیان و هەر کاتێک بیانەوێت دەتوانن مووچەکەیان وەربگرن.

زانیاریی بەدەستهاتوو: بەپێی ئەو زانیارییانەی لە بانکی ناوەندی بە ئاڤا دراون، لەمەودوا دابەشکردنی مووچە لە هەژماری من خێرا دەکرێت، هەرکاتێک پارە خرایە سەر هەژماری هەرێمی کوردستان لە بانکی ناوەندی، ڕاستەوخۆ پارەکە دەگوازرێتەوە سەر هەژماری ئەو بانکانەی بەشدارییان لە هەژماری من کردووە کە ژمارەیان هەشت بانکە، بانکەکانیش مووچەی هەر فەرمانبەرێک دەخەنە سەر هەژمارەکەی، بەڵام بەپێی خشتەی وەزارەتەکەیان دەتوانن ڕایبکێشن.

هەندێکجار مووچەخۆران دەتوانن ڕۆژێک پێش خشتەکەش مووچەکانیان ڕابکێشن، بەگشتی مووچەخۆرانی هەژماری من لە ماوەی دوو بۆ سێ ڕۆژدا دەتوانن مووچە وەربگرن.

بۆچی بە یەک ڕۆژ دابەش ناکرێت؟ پرۆسەکە دیجیتاڵییە و دەتوانرێ بە ڕۆژێک مووچەی هەموو مووچەخۆران بدرێت، بەڵام بەهۆی ئەوەی پڕۆژەکە نوێیە و ئەی تی ئێمی زۆر لە شارەکان دانەنراون، فشارێکی زۆریان دەکەوێتە سەر، بۆیە کراوەتە دوو بۆ سێ ڕۆژ.

لێدوانی فەرمی: تیمی هەژماری من بە ئاڤا میدیای گوت، "720 هەزار مووچەخۆر لە پرۆژەی هەژماری من تۆمارکراون، هاوکات 400 هەزار کارت بە مووچەخۆران دراونەتەوە و بۆ مووچەی مانگی دوو زیاتر لە 300 هەزار مووچەخۆر لە ڕێگەی ئامێرەکانی (ئەی تی ئێم) مووچە وەردەگرن".