ڕێکخراوی بازرگانی جیهانی بۆ ڕووبەڕووبونەوەی بڕیارەکانی ترەمپ داوای کۆبوونەوەی بەپەلە دەکات

ئاڤا نیوز

بەڕێوبەری گشتی ڕێکخراوی بازرگانی جیهانی ڕایدەگەیەنێت بڕیارەکانی ترەمپ بۆ سەپاندنی باجی گومرکی بە سەر وڵاتاندا کاریگەری خراپی لە سەر بازرگانی جیهانی دەبێت.

وێنە گەورەکە:  دۆناڵد ترەمپ باجی گومرکی بەسەر 50 وڵاتدا سەپاند و جەنگی بازرگانی دژ بە جیهان ڕاگەیاند، ژووری بازرگانی ئەمریکاش لە ئەنجامی بڕیارەکانی ترەمپ هۆشداری تووند لە ئەگەری بەرزبوونەوەی بەرچاوی نرخەکان دەدات.

بڵاوکراوەی فەرمی: نگۆزی ئۆکۆنجۆ یویالا، بەڕێوبەری گشتی ڕێکخراوی بازرگانی جیهانی، ڕایگەیاند: " بڕیارەکانی دۆناڵد ترەمپ، سەرۆکی ئەمریکا بۆ سەپاندنی باجی گومرکی بە سەر وڵاتاندا دەبێتە هۆی کەمبوونەوەی بازرگانی جیهان بە ڕێژەی 1% و بەربەستێکی گەورە دەبێت لە بەردەم گەشەسەندنی ئابووری وڵاتان."

زانیاریی زیاتر: بەڕێوبەری گشتی ڕێکخراوی بازرگانی جیهان بانگەواز لە وڵاتانی ئەندامی ڕێکخراوەکە دەکات بۆ کۆبوونەوە و گفتوگۆکردن لە پێناو دۆزینەوەی چارەسەری بەپەلە و پێویست بۆ جەنگی بازرگانی و کەمکردنەوە و نەهێشتنی ناکۆکی و گرژییە بازرگانییەکان.