ئەم هەفتەیە لیستی مووچەی مانگی چوار تەواو دەکرێت

ئاڤا نیوز

ڕێکارەکانی ئامادەکردنی لیستی مووچەی مانگی چوار خێراکراون و بڕیارە ئەم هەفتەیە لیستەکە تەواو بکرێت و ڕەوانەی بەغدا بکرێت.

وێنە گەورەکە: هەوڵەکان بۆ ئامادەکردن و ناردنی لیستی مووچەی مانگی چواری فەرمانبەران چڕتر کراونەتەوە، وەزارەتی دارایی سەرجەم وەزارەت و فەرمانگەکانی ئاگادار کردووەتەوە، تاوەکو کۆتایی ئەم هەفتەیە لیستی مووچە تەواو بکەن.

زانیاریی بەدەستهاتوو: وەزارەتی دارایی و ئابووریی کوردستان سەرجەم وەزارەت و فەرمانگەکانی ئاگادار کردووەتەوە، تاوەکو کۆتایی ئەم هەفتەیە لیستی مووچە تەواو بکەن و هیچ کەم و کوڕییەکی نەبێت،  هەر ئەم هەفتەیەدا لە هەولێر وردبینیشی بۆ بکرێت.

زانیاریی زیاتر: وەزارەتی دارایی، فەرمانگەی تەکنەلۆژیای زانیاری، بەرێوەبەرایەتیی ژمێرکاری و بەشی ژمێرکای سەرجەم وەزارەت و فەرمانگەکان، پەلە دەکەن لە ئامادەکردنی لیستی مووچە، تا بەتەواوی ئامادەبێت و بنێردرێت بۆ وەزارەتی دارایی عێراق، بۆ ئەوەی لەوێ هاوشێوەی مانگەکانی ڕابردوو دەست بە وردبینی و ڕێکارەکانی خەرجکردنی پارە بکرێت.

خاڵە ئەرێنییەکان: خێرا کارکردن لە ئامادەکردنی لیستی مووچە، بۆ ئەوەیە مووچەی فەرمانبەران و خانەنشینان لە وادەی خۆی بنێردرێت، و دەست بە دابەشکردنی بکرێت، دوا نەکەوێت بۆ مانگی پێنج.