پزیشكێکی کورد بانگهێشتی ژاپۆن دەکرێت

ئاڤا نیوز

بۆ یەکەمجارە لەسەر ئاستی عێراق پزیشکێکی کورد بۆ کۆنفراسی نێودەوڵەتی گەشەپێدراوی دەم و ددان بانگهێشتی ژاپۆن دەکرێت کە بڕیارە ڕۆژانی 14 و 15ـی ئەم مانگە کۆنفراسەکە بکرێت.

وێنە گەورەکە: ساڵانە لە کۆنفراسە جیهانییەکان، پسپۆڕ و لێکۆڵەرانی کورد بەشداریی کارایان هەیە. پزیشکی دەم و ددان یەکێکە لەو بوارانەی لێکۆڵەرانی کورد کە ساڵانە بەشداری کۆنفراسە زانستییەکان دەکەن.

لێدوانی فەرمی: د. باهۆز هیمداد، پزیشکی دەم و ددان بە ئاڤا میدیای وت، "وەک یەکەم کورد لە کۆنفراسەکە لەسەر نوێترین چارەسەری پزیشکی بۆ پزیشکە ژاپۆنی و نێودەوڵەتییەکان قسە دەکەم، جگە لەخۆم وەکو پزیشک ئەوەی زیاتر شانازی پێوە دەکەم ئەوەیە وەکو کورد بانگهێشت کراوم.

ئەوەی پێویستە بیزانیت: کۆنفراسی 3rd International Hybrid Conference on Dentistry & Oral Health بۆ سێیەم ساڵ لە شاری تۆکیۆی ژاپۆن بەردەوامە، یەکەم کۆنفڕانس لە شاری بەرشەلۆنەی ئیسپانیا و دووەم کۆنفرانسیش  لە ڕۆمای ئیتاڵیا بەڕێوە چوو. بڕیارە ئەمساڵ 21 توێژەر بەشداری بکەن و نوێترین تەکنۆلۆژیا و توێژینەوەی بواری دەم و ددان دەخرێنەڕوو.