هەشت بوومەلەرزەی بەهێز ئیستەنبووڵیان هەژاند

ئاڤا نیوز

لە ماوەی کاتژمێرێکدا هەشت بوومەلەرزە بەسەر یەکەوە شاری ئیستەنبووڵی تورکیای هەژاند، بەهێزترینیان بە گوڕی 6.2 بوو کە بەتەواوی هەستی پێکرا، تاوەکو ئێستا هیچ زیانێکی گیانی تۆمارنەکراوە.

چیرۆکی سەرەکی: کاتژمێر 12.49ـی نیوەڕۆ، هەشت بوومەلەرزە بەسەریەکەوە شاری ئیستەنبووڵی هەژاند، سەنتەری بوومەلەرزەکە لە مەڕمەڕە بووە کە بە گوڕی 6.2 بوو، هەموو خەڵکی ناوچەکە و شارەکانی دەوروبەری هەستییان پێکرد.

زانیاریی زیاتر: بەهۆی ئەوەی ئەمڕۆ جەژنی منداڵان بوو لە تورکیا، زۆربەی خێزانەکان لە ماڵ نەبوون و منداڵەکانیان بۆ دەرەوە بردووە، ئەمەش هۆکارێکە بۆ نەبوونی زیانی گیانی.

لێدوانە فەرمییەکان:

ڕەجەب تەیب ئەردۆغان، سەرۆککۆماری تورکیا: هیوای سەلامەتی بۆ هاووڵاتییانی ئیستەنبووڵ دەخوازین. ئافاد و وەزارەتی ناوخۆ و لایەنە پەیوەندیدارەکان، چاودێری دۆخەکە دەکەن.

عەلی یەرلیکایە، وەزیری ناوخۆی تورکیا: بۆ ڕێککاری خۆپارێزی مەچنە ناو ماڵ و باڵەخانەکان، تەلەفۆن بەکارمەهێنن، تەنیا لە ڕێگەی نامەوە قسە لەگەڵ یەک بکەن. ئەم شەش کاتژمێرە بۆ ئێمە گرنگە خۆتان بپارێزن.

ئافاد بۆ بوومەلەرزە: هێڵەکانی تەلەفۆن بەکارمەهێنن تاوەکو شەش کاتژمێری دیکە.

ئەوەی پێویستە بیزانیت: شارەزایان هۆشداریان داوە لەوەی ئەمساڵ تورکیا مەترسی تسۆنامی لێدەکرێت، هەر بۆیە ڕوودانی بوومەلەرزەکەی ئەمرۆ ترسێکی زۆری لە دڵی خەڵکی دروست کردووە، هاووڵاتییان لەسەر شەقامەکان دەمێننەوە.