ئاڤا بەڵگە و زانیاری و لێدوانی تایبەت لەسەر ڕاگرتنی ڕاکێشانی پارە لە ماستەر کارد و ڤیزە کارد بڵاو دەکاتەوە

ئاڤا نیوز

 

لەژێر فشاری ئەمریکا، ڕێککارەکانی ڕووبەڕووبوونەوە و ڕێگریکردن لە سپیکردنەوەی پارە و بردنە دەرەوەی دۆلار لە هەرێمی کوردستان و عێراق تووندتر دەکرێن. پارێزگاری بانکی ناوەندیش زانیارییەکانی ئاڤا لەوبارەیەوە لە لێدوانێکی ڕۆژنامەوانیدا پشتڕاست دەکاتەوە. 

 

وێنە گەورەکە: ئەمریکا بەمەبەستی فشار خستنەسەر عێراق بۆ ئەوەی ڕێگری بکات لە سپیکردنەوە و ناردنە دەرەوەی دۆلار بۆ ئێران، هەنگاوەکانی زیاتر کردوون و ژمارەی ئەو بانکانەی خستوویەتییە لیستی سزاکانی زیادی کردووە، هاوکات بەردەوام ڕێککارەکانی تووندتر دەکاتەوە.

 

زانیاریی بەدەستهاتوو: ئاڤا زانیویەتی لەکۆی 54 بانک کە مۆڵەتیان لە بانکی ناوەندی عێراق وەرگرتووە، ئێستا 35 لەو بانکانە بەتۆمەتی تێوەگلان لە سپیکردنەوەی پارە سزادراون. 

 

هۆکارە زانراوەکان: لە ڕێککەوتی 21ی4 وەکو یەکەم میدیا ئاڤا بڵاویکردەوە، بەپێی بڕیارێکی بانکی ناوەندی عێراق، لە 1ی6ی ئەمساڵەوە، تاوەکو کاتێکی نادیار مامەڵە کردن لە ڕێگەی ماستەر کارد و ڤیزە کاردەکانی بانکەکانی هەرێمی کوردستان و عێراق کە دەرەوە سنووردار دەکرێن و ناتوانرێت پارەی کاشیان پێ ڕابکێشرێت. 

 

-    ڕاکێشانی پارە تەنیا لە ڕێگەی سویچ کاردەوە دەبێت، کە خاوەنداری دەگڕێتەوە بۆ کۆمپانیایەکی ئەمریکا. 

-    ماوەی 40 ڕۆژ بۆ چارەسەرکردنی ئەو گرفتە دیارکراوە. 

گۆشەیەکی دیکەی دیمەنەکە: بەگوێرەی بەڵگەنامەیەک لە دەست ئاڤا کەوتووە، کۆمپانیای ماستەر کارد لە 4-16 ئاگادارییەکی بۆ کۆمپانیاکانی پارەدانی ئەلیکترۆنی عێراق ناردووە، کە چەند خاڵ و داواکارییەک سەبارەت بە خاوەندارێتی بانک و کۆمپانیاکان لەخۆ دەگرێت:- 

-    پابەندبوونیان، سپیکردنەوەی پارە، بەڕێوەبردن و خزمەتگوزارییە بانکییەکان، ئەمانە وەکو مەرج بۆ دەستکردنەوە بە چالاکییە ئاساییەکان دانراون. 

لێدوانە فەرمییەکان: چەند ڕۆژێک بەر لە ئێستا پارێزگاری بانکی ناوەندی عێراق لە لێدوانێکی ڕۆژنامەوانیدا هەواڵەکەی ئاڤای پشتڕاستکردەوە و ڕایگەیاند، ماستەر کارد و ڤیزە کارد کێشەیان بۆ دروستبووە و لە هەوڵداین پێش مانگی شەش ئەو گرفتە چارەسەر بکەین.

-    ڕێککەوتن کراوە بۆ چارەسەرکردنی ئەو کێشەیە، لەوانە کۆمپانیاکانی ڤیزا و ماستەر بە هەماهەنگی لەگەڵ خەزێنەی ئەمریکا و بانکی یەدەگی فیدراڵی ئەمریکا و کۆمپانیایەکی وردبینی.

بەرپرسێکی حکومەتی کوردستان، کە تایبەتمەندە بە کاروباری بانکەکان و پرسە داراییەکان بە ئاڤای ڕاگەیاند، عێراق زۆر نیگەرانە لەو هەوڵەی ئەمریکا، چونکە دەکرێت بڕیارەکە لە مانگی شەشەوە بخرێتە بواری جێبەجێکردنەوە. 

-    ئێستا پارێزگاری بانکی ناوەندی و تەیف سامی، وەزیری دارایی عێراقیش بۆ چارەسەری هەمان گرفت لە ئەمریکان.