ئەنجوومەنی وەزیران پرسی دواکەوتنی مووچەی مانگی چوار تاوتوێ دەکات

ئاڤا نیوز 

سبەی کۆبوونەوەی ئەنجوومەنی وەزیران بەسەرپەرشتی مەسرور بارزانی بەڕێوە دەچێت و تاوتوێی پرسی دواکەوتنی مووچەی مانگی چوار و نرخی کارەبای 24 کاتژمێری و وردبینی لە ڕاپۆرتی هاوبەشی دیوانی چاودێری وەزارەتی دارایی هەولێر و بەغدا دەکرێت. 

 

زانیاریی بەدەستهاتوو: سەرچاوەیەکی باڵا لە حکومەتی کوردستان بە ئاڤا ڕاگەیاند، ئاوات شێخ جەناب، وەزیری دارایی و ئابووری، سبەی لە میانی کۆبوونەوەکە ڕاپۆڕتێک تێروتەسەل لەبارەی دۆخی دارایی و میزان موراجەعەی مانگی پێشوو و  هۆكاری دواكەوتنی ناردنی پارەش لەلایەن بەغداوە دەخاتەڕوو.

دواتر گفتووگۆ لەسەر دۆزینەوەی ڕێگە چارەیەک بۆ کۆتاییهێنان بە دواکەوتنی مووچە و نەهێشتنی بیانووەکانی بەغدا دەکەن. 

لەلایەکی دیکەوە: ئاڤا ئەوەشی زانیوە کە هەر لە کۆبوونەوەکە گفتوگۆ لەبارەی دیاریکردنی نرخێکی گونجاو بۆ پرۆژەی ڕووناکی کە بڕیارە کارەبای هەموو شارەکانی کوردستان بکات بە 24 کاتژمێری. 

بڕگەی سێیەمی كۆبوونەوەی ئەنجوومەنی وەزیران لەبارەی هەماهەنگی نێوان هەولێر و بەغدا دەبێت، واتا وەزارەتەكان ڕادەسپێردرێن بۆ هەماهەنگی و  هاریكاریی دەستەی هاوبەشی وردبینیی هەردوو دیوانی چاودێریی دارایی هەرێمی كوردستان و حکومەتی عێراقی فیدڕاڵ، كە ئێستا سەرقاڵی ئامادەكردنی ڕەشنووسی ڕاپۆرتی هاوبەشن  لەسەر وردبینیی دارایی هەرێمی كوردستان لە 1.1 تا 3.31ی  2025 ئەمساڵ لەبەر ڕۆشنایی یاسای بودجەی عێراق.