بەغدا هۆکاری نەناردنی پارەی مووچەی کوردستان ئاشکرا ناکات

ئاڤا نیوز

بەغدا ئەمڕۆش پارەی مووچەی مانگی چواری مووچەخۆرانی هەرێمی کوردستانی نەنارد و هۆکاری نەناردنیشی ئاشکرا ناکات. ئاڤا پەیوەندی بە چەندین بەرپرسی کورد لە بەغدا کرد، ئەوانیش دەڵێن "بەغد وەڵاممان ناداتەوە".

زانیاریی تایبەت: ئاڤا بەدواداچوونی زۆری بۆ بابەتەکە کرد و پەیوەندی بە چەندین بەرپرسەوە کرد، وتیان بەرپرسانی بەغدا تەنانەت وەڵامیش نادەنەوە، هیچ هۆکارێکیش ناڵێن کە بۆچی پارە نانێرێت.

ئەوەی پێویستە بیزانیت: لیستی مووچەی مانگی چوار هیچ کێشەیەکی نەبووە و وەزارەتی دارایی و حکومەتی هەرێمی کوردستانیش هەموو ئەرکەکانی خۆیان لە بابەتی داهاتی ناوخۆ و میزان موراجەعە بەجێ گەیاندوون.

لێدوانی فەرمی: جەمال کۆچەر، ئەندامی لیژنەی دارایی پەرلەمانی عێراق قسەی بۆ ئاڤا کردووە دەڵێ: ڕاستە کێشەی پارەی کاش - نەقد لە عێراق هەیە، بەڵام حکومەتی عێراق لە هەموو بارودۆخەکان مووچەی فەرمانبەرانی خۆی داوە، بۆیە نەناردنی مووچەی خەڵکی کوردستان پەیوەندی بە پارەی کاشەوە نییە، بەڵکو تەیف سامی ترسی لە ناردنی مووچەی فەرمانبەرانی کوردستان هەیە.

لەلایەکی دیکەوە: ڕێباز حەملان، بریکاری پێشووی وەزارەتی دارایی عێراق، کە یەک دوو مانگ پێش ئێستا کاتێک وەک بریکاری وەزارەتی دارایی عێراق دەستی لەکار کێشایەوە، هەر لە ئاڤا میدیا پێشبینی ئەم دۆخەی ئێستا کرد و وتی بەرپرسانی بەغدا لەگەڵ کوردستان نیەتیان پاک نییە و بەمزووانە کێشە بۆ مووچە دروست دەکەن.