کرێملین: خوێندنەوە بۆ پێشنیازی ئاگربەستێکی 30 ڕۆژە دەکەین

ئاڤا نیوز

 

سەرکردەکانی ئەوروپا داوایان لە ڕووسیا کردووە کە ڕازی بێت بە ئاگربەستێکی بێ مەرج بۆ ماوەی 30 ڕۆژ لەگەڵ ئۆکراینا کە لە ڕۆژی دووشەممەوە دەستپێدەکات، ڕووسیاش نیازی هەیە بیر لەو بابەتە بکاتەوە.

 

وێنە گەورەکە: نزیکە سێ ساڵە جەنگی نێوان ئەو دوو وڵاتە بەردەوامە تاوەکو ئێستا ئاگربەستێکی ماوە درێژ لە نێوانیان نەهاتووەتە ئاراوە، پێشتر پووتین، ئاگربەستێکی کاتی لەگەڵ ئۆکراینا ڕاگەیاند کە لە ڕۆژانی 8 تا 10ی مانگی 5 بوو و هیچ هێرشێک لەلایەن ڕووسیاوە ئەنجام نەدرا، لەبەرامبەر ئەمەدا ئۆکراینا دەستبەجێی ڕەخنەی لە ئاگربەستە گرت و ڕایگەیاند، بۆچی پابەندی ئاگربەستی 30 ڕۆژە نابێت و ئەم جەنگە ڕابگرێت. 

 

لێدوانی فەرمی: دیمیتری پیسکۆڤ، وتەبێژی کرێملین لەبارەی ئەم بانگەوازە ڕایگەیاند، تاوتوێی ئەو پێشنیازە دەکەن بەڵام وەڵامی فشارەکان نادەنەوە.

 

زانیاریی زیاتر: ئەم بانگەوازە لەلایەن وڵاتانی هاوپەیمانی ئۆکراینا  لەوانە، فەرەنسا، بەریتانیا، پۆڵەندا و ئەڵمانیا کراوە، دواتریش لە ڕێگەی تەلەفۆنەوە لەگەڵ دۆناڵد ترەمپ، سەرۆکی ئەمریکا تاوتوێی پلانەکەیان کرد، هەر لەڕێگەی ئەم پلانەوە سەرکردەکانی ئەوروپا هەڕەشەیان لە ڕووسیا کرد کە ئەگەر پابەند نەبێت سزای نوێ و بەرفراوانیان بەسەردا دەسەپێنرێت.

 

لەلایەکی دیکەوە: لەلای خۆیەوە ترەمپ ڕایگەیاند، لەگەڵ مۆسکۆ و کێیڤ بەردەوام دەبن لەکارکردن تاوەکو کۆتایی بە ململانێیەکان بهێنن.