ئەم مانگە هەزاران خانەنشین پێنج مووچە بەیەکەوە وەردەگرن

ئاڤا نیوز

بەشێکی دیکەی ئەو فەرمانبەرانەی لە سەرەتای ئەمساڵەوە، بەهۆی گۆڕانکاری لە تەمەنی خانەنشینی، خانەنشین بوون، مامەڵەکانیان تەواو بووە، ژمارەیان 5 هەزار و 300 کەسە و لەگەڵ لیستی مووچەی مانگی پێنج ناوەکانیان ڕەوانەی بەغدا دەکرێت و ئەم مانگە پێنج مووچە بەیەکەوە وەردەگرن.

وێنە گەورەکە: لە سەرەتای ئەمساڵەوە تاوەکو ئێستا، 10 هەزار و 500 کەس مامەڵەی خانەنشینیان تەواوبووە لەو ژمارەیە دوو هەزار و 500 کەس 12 مووچەکەی ئیکرامیە وەردەگرن، واتا خزمەتیان سەرووی 25 ساڵە و 180 ڕۆژ مۆڵەتی کۆکراوەیان هەیە.

لێدوانی فەرمی: سەرچاوەیەک لە بەڕێوەبەرایەتی گشتیی خانەنشینی هەرێمی کوردستان بە ئاڤای گوت، "نزیکەی 15 هەزار فەرمانبەر ماون کە مامەڵەکانیان تەواو بکرێت و بخرێنە لیستی خانەنشینی، لەو ژمارەیە چوار هەزار کەس مامەڵەکانیان لە بەڕێوەبەرایەتی خانەنشینی پارێزگاکانە و 9 هەزاری دیکە لەو فەرمانگانەیە کە  پێشووتر خزمەتی وەزیفیان لێکردووە."

زانیاریی زیاتر: بەگوێرەی دوایین ڕێنمایی وەزارەتی دارایی عێراق، کەسێک کاتێک تەمەنی دەبێتە 60 ساڵ خانەنشین دەبێت بەبێ گوێدان بە ماوەی خزمەتەکەی. ئەگەر کەسێک لەدایکبووی 1965-07-01، بێت ئەوا لە 2025-07-01 تەمەنی 60 ساڵی پڕ دەکات، واتا کە دەبێتە 60ساڵ و یەک ڕۆژ خانەنشین دەبێت.

مەبەست لەوەش کە دەڵێت بێ گوێدانە ماوەی خزمەتەکەی، واتە خزمەتی هەرچەند بێت خانەشین دەبێت، بەڵام نابێت خزمەتەکەی لە 15 ساڵ کەمتر بێت.

هەر فەرمانبەرێک 15 ساڵ کەمتر خزمەتی هەبێت، بەگوێرەی یاسای یەکگرتووی خانەنشینی عێراق، ئەوا خانەنشین نابێت و تەنیا پاداشتی خزمەت وەردەگرێت.

باکگراوند: 2025-01-15، سەرۆكوەزیران مەسرور بارزانی، بە نووسراوی ژمارە 191 بڕیاری كەمكردنەوەی تەمەنی خانەنشینی لە 63 ساڵەوە بۆ 60 ساڵ دا، هاوكات ماوەی خزمەتی لە 15 ساڵەوە بەرز كردەوە بۆ 25 ساڵ بۆ كەسێک كە ئارەزوومەندانە داواكاری خانەنشینی پێشكەش بكات.