فەرەنسا گەورەترین پرۆژەی کشتوکاڵی لەسەر ئاستی ڕۆژهەڵاتی ناوەڕاست لە هەولێر جێبەجێ دەکات

ئاڤا نیوز

فەرەنسا گەورەترین پرۆژەی کشتوکاڵی بە ناوی پلامێر پرۆجێکت لەسەر ئاستی ڕۆژهەڵاتی ناوەڕاست بە سەرمایەی دەیان ملیۆن دۆلار لە سنووری هەولێر جێبەجێ دەکات و سەدان هەلی کار دەڕەخسێنێت.

وێنە گەورەکە: حکومەتی هەرێمی کوردستان کارئاسانی بۆ وەبەرهێنەر و کۆمپانیا بیانییەکان دەکات تاوەکو کار و پرۆژەکانیان بهێننە کوردستان، لەم چوارچێوەیەشدا کۆمپانیایەکی فەرەنسی گەورەترین پرۆژەی وەبەرهێنان لەسەر ئاستی ڕۆژهەڵاتی ناوەڕاست لە هەولێری پایتەخت دەکاتەوە.

لێدوانی فەرمی: بەرگەشت ئاکرەیی، گوتەبێژی دەستەی وەبەرهێنان بە ئاڤای ڕاگەیاند: ناوچەیەکی گەورەی وەبەر‌هێنانی کشتوکاڵیی تایبەت بە چاندنی دار و درەخت لەسەر ڕووبەری 25 دۆنم زەوی لەسەر ڕێگای هەولێر – خەبات دەکرێتەوە. نەمامگەیەکی مۆدێرنە و لە قۆناغی یەکەمدا 600 هەزار شەتڵی 500 جۆر دار و درەخت لەخۆدەگرێت. سەدان هەلی کاریش بۆ خەڵکی سنوورەکە دابین دەکات. 

ئەوەی پێویستە بیزانیت: پڕۆژەکە ناوی پلامێر پرۆجێکتە، بە سەرمایەی دەیان ملیۆن دۆلار جێبەجێ دەکرێت و ئێستا لە قۆناغی وەرگرتنی مۆڵەتدایە، چاوەڕوان دەکرێت لە کابینەی دەیەمدا دەست بە کارەکانی بکات. کۆمپانیا فەرەنسییەکە لە وڵاتەکانی مەغریب، مۆریتانیا و سەنیگال ناوچەی کشتوکاڵیی لەم شێوەیەی هەیە.

بۆچی گرنگە: پرۆژەکە کاریگەریی ڕاستەوخۆی لەسەر پێشختسنی سێکتەری کشتوکاڵ لە هەرێمی کوردستان دەبێت، لەگەڵ ئەوەشدا سەدان هەلی کار بۆ هاونیشتمانیان دابین دەکات.