کەشناسیی عێراق: خۆڵبارین بەردەوام دەبێت و پلەکانی گەرماش کەمێک بەرز دەبنەوە

ئاڤا نیوز

دەستەی کەشناسیی عێراق، پێشبینیی به‌رده‌وامیی خۆڵبارین و به‌رزبوونه‌وه‌یه‌كی كه‌می پله‌كانی گه‌رما بۆ ئەم هەفتەیە دەکات.

 

ڕاگەیێنراوی فەرمی: بەگوێرەی ڕاگەیێنراوی دەستەکە، کەشوهەوای سبەی یەکشەممە بەمشێوەیە دەبێت: ئاسمان ساماڵ دەبێت، ئاراسته‌‌ی (با) لە باكووری ڕۆژئاوا ده‌بێت و خێراییه‌كه‌ی له‌نێوان 10-20كم/ لە كاتژمێرێکدا دەبێت، لە کاتەکانی ڕۆژدا چالاكتر ده‌بێت و خێراییه‌كه‌ی ده‌گاته‌ 30-40 کم/ لە كاتژمێرێکدا، كه‌ ده‌بێته‌ هۆی خۆڵبارین لە هه‌ردوو ناوچه‌ی ناوه‌ڕاست و باشوور.

زانیاریی زیاتر: بەگوێرەی پێشبینییەکانی دەستی کەشناسیی عێراق پێشبینییەکان بۆ ڕۆژی دووشەممە و ڕۆژانی داهاتوو بەمشێوەیە دەبێت: کەشوهەوای ڕۆژی دووشەممە به‌گشتی ئاسمان ساماڵ و گه‌رم ده‌بێت و پله‌كانی گه‌رما هاوشێوه‌ی ڕۆژی پێشوو ده‌بن.

- ڕۆژی سێشەممە ئاسمان ساماڵ ده‌بێت و پله‌كانی گه‌رما له‌ ناوچه‌كانی ناوه‌ڕاست و باکوور كه‌مێك به‌رز ده‌بنه‌وه‌ و له‌ ناوچه‌کانی باشووریش هاوشێوه‌ی ڕۆژی پێشوو ده‌بن.
- ڕۆژی چوارشەممە له‌ ناوچه‌كانی ناوه‌ڕاست و باشوور ئاسمان ساماڵ ده‌بێت و له‌ ناوچه‌ی باكوور نیمچه‌ هه‌ور ده‌بێت، پله‌كانی گه‌رماش هاوشێوه‌ی ڕۆژی پێشوو ده‌بن.

 

لەلایەکی دیکە: بەگوێرەی ده‌سته‌كە، به‌رزترین پله‌كانی گه‌رمای پێشبینیكراوی بۆ سبەی یەکشەممە به‌مشێوه‌یه‌ی خواره‌وه‌ ده‌بێت: بەغدا، دیالە، کەرکووک، سەڵاحەدین، واست و دیوانییە 41 پلە، هەولێر 39 پلە، سلێمانی 38 پلە، نەینەوا و ئەنبار 40 پلە، کەربەلا، نەجەف، بابل، ناسریە و موسەننا 42 پلە، میسان و بەسرە 44 پلە.