ئەپیکۆر: بەغدا هەنگاوی پێویستی بۆ هەناردەکردنەوەی نەوتی هەرێمی کوردستان نەناوە

ئاڤا نیوز

 

كۆمەڵەی پیشەسازیی نەوتی كوردستان (ئەپیکۆر) وێڕای ئاشكراکردنی زیانەکانی ڕاگرتنی هەناردەکردنی نەوت، ڕایدەگەیێنێت کە حکومەتی عێراق هەنگاوی پێویستی نەناوە بۆ هەناردەکردنەوەی نەوتی هەرێمی کوردستان.

وێنە گەورەکە: دوو ڕۆژی دیکە ساڵێکی تەواو بەسەر وەستاندنی هەناردەی نەوتی هەرێمی کوردستان لەڕێگەی بەندەری جەیهانی تورکیاوە تێپەڕدەبێت. بەگوێرەی ڕاپۆرتێکی ئەپیکۆر کە کۆپییەکی بۆ ئاڤا نیوز نێردراوە، زیانی عێراق و کۆمپانیاکان نزیکەی 11 ملیار دۆلار بووە، ڕۆژانەش عێراق 800 هەزار دۆلار سزا دەدرێت، بەهۆی ئەوەی بە مەرجەكانی ڕێككەوتنی بۆری نەوتی عێراق - توركیا پابەند نەبووە.

لێدوانی فەرمی: مایڵز كاگینز، گوتەبێژی ئەپیكور دەڵێت: "ئەپیكور بەردەوامە لە هەوڵەكانی لەگەڵ لایەنە پەیوەندیدارەكان بۆ دەستپێكردنەوەی بەرهەمهێنان و هەناردەکردنی نەوت لەڕێگەی بۆری نەوتی عێراق - توركیاوە."

لەلایەکی دیکەوە: ئەپیکۆر داوای لە کۆشکی سپی کردووە پێشوازی لە محەممەد شیاع سوودانی، سەرۆکوەزیرانی عێراق نەکەن تاوەکو ڕێگە بە هەناردەكردنەوەی نەوتی بەرهەمهێنراو لە هەرێمی كوردستان دەدرێت بۆ بازاڕەكانی جیهان.

زانیاریی زیاتر: بەگوێرەی ڕاپۆرتەکەی ئەپیکۆر، ڕاگرتنی هەناردەی نەوتی هەرێمی کوردستان گوشاری زیاتری خستووەتە سەر بازاڕی ناهاوسەنگی وزە، كە بەهۆی سزاكانی سەر ڕووسیا و هەڕەشەكانی دەریای سوور هاوسەنگی لە دەست داوە.