زانیاریی پشت پەردە؛ ئەم هەفتەیە مووچەیەک دەنێردرێت

ئاڤا نیوز

لەژێر گوشاری هەرێمی کوردستان، بڕیارە ئەم هەفتەیە حکومەتی عێراق مووچەیەک بۆ هەرێمی کوردستان بنێرێت، تا دەگەنە ڕێککەوتنی کۆتایی لەبارەی هەنارەدەکردنەوەی نەوت و داهاتی ناوخۆ و مووچە.

بۆچی گرنگە: 75 ڕۆژە حکومەتی عێراق مووچەی مووچەخۆرانی هەرێمی کوردستانی خەرج نەکردووە، سەرباری ئەوەی هەرێمی کوردستان چەندین هەنگاوی کرداری بە ئاراستەی چارەسەرکردنی کێشەی مووچە و نەوت ناوە، بەڵام عێراق هەرجارە و بە بیانوویەک ئامادەنییە ڕێککەوتن بکات و مووچەی خەڵکی کوردستان ڕەوانە بکات. 

زانیاریی تایبەت: بەپێی زانیارییەکانی ئاڤا لەپشت پەردە گفتوگۆ لەنێوان هەولێر و بەغدا ڕوودەدەن، هەوڵەکان بەردەوامن بۆ ناردنی مووچە و چارەسەرکردنی کێشەکانی هەولێر و بەغدا، ئاڤا زانیویەتی لە ڕۆژانی داهاتوودا و لەم هەفتەیەدا بڕیارە مووچەیەک بنێردرێت. دوای ناردنیشی گفتوگۆکان لەنێوان هەولێر و بەغدا چڕ دەکرێنەوە بە ئاراستەی گەیشتن بە چارەسەری کۆتایی.

 

هەنگاوی داهاتوو: بڕیارە ئەمشەو و سبەی چوارشەممە شاندێکی باڵای سیاسیی هەرێمی کوردستان لەگەڵ بەرپرسانی عێراق کۆببنەوە. بەرپرسێکی باڵای حکومەتی عێراق بە ئاڤای گوت: شاندە سیاسییەکە لەنێوان پارتی و یەکێتی هاوبەش دەبێت.

ئەوەی پێویستە بیزانیت: شاندەکە سبەی چوارشەممە بەشداریی لە کۆبوونەوەی هاوپەیمانێتیی ئیدارەی دەوڵەت دەکات، واتە سەرجەم لایەنەکانی بەشدار لە حکومەتی عێراق، کورد و سوننە و شیعە پێکەوە کۆدەبنەوە و گفتوگۆی جددی و یەکلاکەرەوە لەبارەی چارەسەرکردنی کێشەکانی نێوان هەولێر  و بەغدا دەکەن، لەباری ناردنی مووچەی خەڵکی کوردستان و هەناردەکردنەوەی نەوت  دەکەن.

 

لەلایەکی دیکە: ئەمڕۆ سێشەممە، ڕێککەوتی 15ـی 7ـی 2025، کۆبوونەوەی ئەنجوومەنی وەزیرانی عێراق بەسەرپەرشتیی محەممەد شیاع سوودانی بەڕێوەچوو، بەڵام گفتوگۆ لەبارەی کێشەی مووچەخۆرانی هەرێمی کوردستان نەکرا.