DNOـی نەرویجی: پلانمان هەیە بەرهەمهێنان لە کوردستان بگەڕێنینەوە بۆ 100 هەزار بەرمیل لە ڕۆژێکدا

ئاڤا نیوز

کۆمپانیای DNOـی نەرویجی لە نوێترین ڕاپۆرتی داراییدا ڕایگەیاند، سەرەڕای نیگەرانییە ئەمنییەکان و زیانەکانی هێرشە درۆنییەکان، بەرهەمهێنانی نەوتی لە کێڵگەکانی هەرێمی کوردستان لە هەردوو كێڵگەی پیشخابوور و تاوكێ بە شێوەی تاقیکاری بۆ 55 هەزار بەرمیل لە ڕۆژێکدا بەرزکردووەتەوە و داهاتەکانیشی لە ڕێگەی فرۆشتنی ناوخۆییەوە مسۆگەر کردووە.

وێنە گەورەکە: لە ماوەی ڕابردوو بەهۆی هێرشە درۆنییەکان بۆ سەر کێڵگە نەوتییەکانی هەرێمی کوردستان، ئاستی بەرهەمهێنانی نەوت بە ڕێژەیەکی بەرچاو کەمی کرد، ئێستا کۆمپانیاکان لە هەوڵدان ئاستی بەرهەمهێنانەکان بگەڕێننەوە هەمان ئاستی پێشوو.

ڕاگەیێنراوی فەرمی: لە ڕاگەیێنراوێکدا کۆمپانیای DNOـی نەرویجی ئاشکرای کردووە، هێرشە درۆنییەکانی مانگی تەمموزی ڕابردوو بوونەتە هۆی زیان گەیاندن بە ئامێرەکانی چارەسەرکردن لە کێڵگەی پێشخابوور و تانکییەکی کۆگاکردنی نەوت لە تاوکێ، بەڵام جەختی کردەوە کە کارەکانیان بەردەوامە.

زانیاریی زیاتر: DNO پلانی ستراتیژیی خۆی بۆ داهاتووی کێڵگەکانی هەرێمی كوردستان خستەڕوو و ڕایگەیاند، بەنیازە دەست بە هەڵکەندنی بیری نوێ بکاتەوە بۆ ئەوەی ئاستی بەرهەمهێنان بگەڕێنێتەوە بۆ 100 هەزار بەرمیل لە ڕۆژێکدا، کە هەمان ئاستی بەرهەمهێنانی پێش ڕاگرتنی هەناردەکردن بوو لە ڕێگەی بۆریی نەوتی عێراق - تورکیاوە.