پرسی دابینکردنی شایستە داراییەکانی جووتیاران دەبردرێتە ئەنجوومەنی وەزیران

ئاڤا نیوز

وەزارەتی بازرگانی ڕەزامەندی دراوە بۆ خەرجکردنی بەشی یەکەمی شایستە داراییەکانی گەنمی جووتیاران، بەڵام وەزارەتی دارایی بڕی پێویستی تەرخان کردووە و پێویستی بە ڕەزامەندی هەیە.

وێنە گەورەکە: زیاتر لە دوو مانگە جووتیارانی هەرێمی کوردستان، لەڕێگەی سایلۆکانی پارێزگاکانەوە نزیکەی 400 هەزار تۆن گەنمیان ڕادەستی وەزارەتی بازرگانی عێراق کرد، دوو بەشی پارەکە بۆ جووتیارانی پارێزگاکانی عێراق خەرجکراوە، تەنیا ئەوەی هەرێمی کوردستان نەنێردراوە.

لێدوانی فەرمی: نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی بە ئاڤای گوت، "دووبارە داتاکانمان ڕادەستی وەزیری بازرگانی عێراق کردووە و ڕەزامەندی داوە لەسەر خەرجکردنی، بەڵام دەبێت لە کۆبوونەوەی ئەنجوومەنی وەزیران داوای بڕێکی زیاتر بکات، ئەوەی شایستە داراییەکانی جووتیارانی کوردستانیش خەرج بکرێت."

ئەمەش بزانە: پشکی هەرێمی کوردستان لە پارەی گەنمی جووتیاران نزیکەی 310 ملیار دینارە و بەگوێرەی گەنمی وەرگیراو لە سایلۆکان بەسەر هەرچوار پارێزگاکە دابەش کراوە.