سەرچاوەی ئاوی سەرچنار بەراورد بە ساڵی ڕابردوو 50% کەمیکردووە

ئاڤا نیوز

بەهۆی کەمی باران بارینەوە سەرچاوەی ئاوی سەرچنار لە شاری سلێمانی بەراورد بە ساڵی ڕابردوو لە 50٪ کەمیکردووە.

وێنە گەورەکە: بەهۆی کاریگەرییەکانی گۆڕانی کەشوهەوا و کەمی بارانبارینەوە، قەیرانی ئاو لە دەیان وڵات و ناوچەی جیاواز دروست بووە، هەرێمی کوردستانیش بەدەر نەبووە لە کاریگەرییەکانی گۆڕانی کەشوهەوا، لەم چوارچێوەیەدا حکومەتی هەرێمی کوردستان هەوڵەکانی بۆ دروستکردنی پرۆژەی ستراتیژیی تایبەت بە گەیاندنی ئاو دەستپێکردووە و ئاو دەگەیێنرێتە کوچە و کۆڵانەکانی شار و ناوچەکان بەبێ جیاوازی تاوەکو هاووڵاتییان لەو گرفتە ڕزگار بکات.

لێدوانی فەرمی: ئامانج جەلال، وتەبێژی بەڕێوەبەرایەتیی ئاوی سلێمانی بە ئاڤای ڕاگەیاند: ساڵانە لە مانگەکانی هەشت و نۆدا سەرچاوەی ئاوی سەرچنار کەمدەکات، بەڵام بەراورد بە ساڵی ڕابردوو سەرچاوەکە بە ڕێژەی لە 50٪ کەمیکردووە، بەڵام دابەشکردنی ئاو بۆ ئەو گەڕەکانە بەردەوامە کە لەڕێگەی سەرچاوەی ئاوی سەرچنارەوە ئاویان پێدەگات.

زانیاریی زیاتر: لەبارەی هێڵی سێیەمی ئاوی دووکان – سلێمانی، ئامانج جەلال بە ئاڤای وت: پڕۆژەکە تەندەرینی بۆ کراوە و چاوەڕێ دەکرێت کۆمپانیا و بەڵێندەرێک وەری بگرێت، بە جێبەجێکردنیشی کێشەی کەمئاوی لە سلێمانی بەڕیژەی 100٪ چارەسەر دەبێت و ئاوی پێویست بۆ تەواوی شاری سلێمانی دابین دەکرێت. بە تەواوبوونی پڕۆژەکەش کێشەی کەمئاوی بۆ چەندین ساڵ لە سلێمانی چارەسەر دەکرێت.