ڕووسیا: ڤاکسینی دژەشێرپەنجە ئامادەیە بۆ بەکارهێنان

ئاڤا نیوز


ئاژانسی  FMBAی ڕووسی ڕایگەیاند:  ئەمساڵ ڤاکسینێکی نوێی شێرپەنجە لە ڕووسیا دروستکراوە  و ئامادەیە  بۆ بەکارهێنان.

چیرۆکی سەرەکی: ئاژانسی فیدراڵی رووسیا بۆ پزیشكی و بایەلۆجی FMBA، ڤاكسینێكی نوێی بۆ نەخۆشییەكانی شێرپەنجە پێشخستووە. ئاژانسەکە ڕایگەیاندووە، قۆناغی تاقیكردنەوەی بەسەركەوتوویی تێپەڕاندووە و ئامادەیە بۆ بەکارهێنان، ڤاکسینەکە دەتوانێت بە ڕێژەی 80% وەرەم یاخود گرێ شێرپەنجەییەکان لەناو ببات.

بڵاوکراوەی فەرمی: بەڕێوەبەری دەزگای فیدراڵی پزیشکی-بایۆلۆجی ڕووسیا ڕایگەیاند: ڤاکسینەکە بەپێی ستانداردە نێودەوڵەتییەکان بۆ ماوەی سێ ساڵ توێژینەوەی لەسەر کراوە، پەرەی پێدراوە و ئەنجامەکان دڵخۆشەکەرن، بەهەموو شێوەیەک ئەم ڤاکسینە سەلامەتە و ڕێگری لە گەشەکردنی خانە شێرپەنجەییەکان دەکات.

شێوازی بەکارهێنان: داواکاری پێشکەش بە وەزارەتی تەندروستیی ڕووسیا کراوە بۆ ئەوەی ڤاکسینەکە بۆ مرۆڤ بەکاربهێنرێت، ئەگەر پەسەند بکرێت بەم نزیکانە بەردەست دەبێت و سەرەتا بۆ ئەو نەخۆشانە بەکاردەهێنرێت کە شێرپەنجەی کۆڵۆن و ڕێخۆڵەیان هەیە.