سەدر هۆشداری لە قەیرانی ئاو دەدات و داوای گفتوگۆ لەگەڵ تورکیا دەکات

ئاڤا نیوز

ڕێبەری ڕەوتی نیشتمانیی شیعە، بانگەوازێک ئاراستەی حکومەتی عێراق دەکات بۆ کردنەوەی دەرگای گفتوگۆ لەگەڵ تورکیا، بەمەبەستی زیادکردنی پشکی ئاوی عێراق و گرتنەبەری ڕێوشوێنی خێرا بۆ ڕووبەڕووبوونەوەی قەیرانی کەمیی ئاو کە وڵاتەکەی گرتووەتەوە.

 

وێنە گەورەکە: بەهۆی گۆڕانی کەشوهەوا و کەم بوونەوەی ڕێژەی بارانبارین و کەم بوونەوەیەکی بەرچاو لە سەرچاوەکانی ئاو لە وڵاتانی دراوسێ،  عێراق ڕووبەڕووی قەیرانێکی وشکەساڵیی تووند بووەتەوە کە بە یەکێک لە مەترسیدارترین ئاڵنگارییە ژینگەییەکان لە مێژووی نوێیدا دادەنرێت.

 

پەیامی فەرمی: موقتەدا سەدر، ڕێبەری ڕەوتی نیشتمانیی شیعە، لە پەیامێکیدا کە ئەمڕۆ بڵاوی کردەوە، هۆشدارییەکی تووندی لەبارەی قەیرانی ئاو لە عێراق دا. سەدر ئاماژەی بەوە دا قەیرانی جیهانیی ئاو گەیشتووەتە عێراق و زەنگی مەترسی لێدراوە، بەتایبەتی لەگەڵ کەم بوونەوەی سامانی ئاوی عێراق و وشکەساڵی و کەم بوونەوەی باران و ڕووبارەکان.

 

لەهەمان کاتدا: ناوبراو داوای لە لایەنە پەیوەندیدارەکان کرد بەپەلە ڕێوشوێنی پێویست بگرنەبەر. لەوانە: کردنەوەی دەرگای گفتوگۆ لەگەڵ تورکیای دراوسێ، بۆ زیادکردنی پشکی ئاوی عێراق و گرتنەبەری ڕێوشوێنی ناوخۆیی بۆ پاراستنی ئاو، وەک دروستکردنی بەنداو و سزادانی بەفیڕۆدەرانی ئاو. هەروەها جەختی لە گرنگی شیرینکردنی ئاوی دەریا کردەوە، بەتایبەت بۆ خواردنەوە و کشتوکاڵ.

 

مەترسییەکان: سەدر وەک ئاگادارکردنەوەیەک، پێشبینی کرد ئەگەر ئەم دۆخە بەردەوام بێت، زیانێکی زۆری تەندروستی و کشتوکاڵی لێبکەوێتەوە و گەلی عێراقیش زیانمەند دەبێت.