دۆسیەی سەرجەم خانەنشینانی مەدەنی نوێی هەرێمی کوردستان کۆتایی هات

ئاڤا نیوز

دۆسیەی سەرجەم خانەنشینانی مەدەنی نوێ تەواو بوو و لەگەڵ لیستی مووچەی مانگی نۆی ئەمساڵدا، ناوی لیستێکی دیکە ڕەوانەی بەغدا دەکرێت بۆ دابینکردنی مووچەکانیان.

وێنە گەورەکە: لە سەرەتای ئەمساڵەوە وردبینی بۆ دۆسیەی 27 هەزار خانەنشین کراوە، لە نوێترین لیستی خانەنشیناندا ناوی 850 کەس ئامادەکراوە و لەگەڵ لیستی مووچەی مانگی نۆ ڕەوانەی بەغدا دەکرێن.

لێدوانی فەرمی: سەرچاوەیەک لە بەڕێوەبەرایەتی گشتیی خانەنشینی هەرێمی کوردستان بە ئاڤای گوت: لە لیستەکەی ئەمجارەدا ناوی 17 خانەنشینی خەڵکی ئیدارەی سەربەخۆی زاخۆ هەیە، کە نۆ مووچە بەیەکەوە وەردەگرن، بەڵام لەگەڵ خەرجکردنی مووچەی مانگی نۆدا. جگە لەوە، ئەوانەی دەیانگرێتەوە، 12 مووچەی کاملی ئیکرامییە و شەش مووچە بنەڕەتییەکەش وەردەگرن.

زانیاریی زیاتر: بۆ مووچەی مانگی حەوت، سێ هەزار و 600 خانەنشین حەوت مووچە بەیەکەوە وەردەگرن. بۆ مانگی هەشتیش، 400 خانەنشین هەشت مووچە بەیەکەوە وەردەگرن.

لەلایەکی دیکەوە: موستەفا سەعدی، بەڕێوەبەری خانەنشینی زاخۆ بە ئاڤای ڕاگەیاند: لە ماوەی نۆ مانگی ڕابردوو  471 فەرمانبەر لە سنووری ئیدارەی سەربەخۆی زاخۆ خانەشین بوون، ڕێکارەکانی تایبەت بە مامەڵەکانی خانەشینان بەباشی و بەبێ کێشە بەڕێوەدەچن.