120 ملیاری داهاتی ناوخۆ ڕادەستی بەغدا دەکرێت

ئاڤا نیوز

نووسراوی خەرجکردنی مووچەی مانگی حەوت لە ئەنجوومەنی وەزیرانی عێراقەوە ئاراستەی وەزیری دارایی عێراق کرا، بەمەش ڕێکارەکانی ناردنی پارە دەست پێدەکات. ئەنجوومەنی وەزیرانی کوردستانیش ئامادەیی 120 ملیار دینار داهاتی ناوخۆی دەربڕیوە و ئەمڕۆ بە شێوەی کاش ڕادەستی لقی هەولێری بانکی ناوەندی عێراق دەکرێت.

چیرۆکی سەرەکی: دوای ڕێککەوتنی سێقۆڵی لەبارەی هەناردەکردنەوەی نەوتی کوردستان کە مەرجێک بوو بۆ ناردنی مووچەی فەرمانبەرانی کوردستان، ئەنجوومەنی وەزیرانی عێراق بڕیاری خەرجکردنی مووچەی مانگی حەوتی دا.

لێدوانی فەرمی: سەرچاوەیەک لە وەزارەتی دارایی کوردستان بە ئاڤای ڕایگەیاند، نووسراوی خەرجکردنی پارە ئامادەیە. بڕی 72 ملیار دینار لە هەولێر و دهۆک کۆکراوەتەوە و ئامادەیە، بڕی 48 ملیار دیناریش لە سلێمانی و هەڵەبجە کۆکراوەتەوە و بڕیارە سبەی پێنجشەممە بگاتە دەستمان. سەرجەم پارەکە پێکەوە بە شێوەی کاش ڕادەستی لقی هەولێری بانکی ناوەندی عێراق دەکرێت.

لەلایەکی دیکەوە: دوای بڕیاری بەغدا بۆ خەرجکردنی مووچەی مانگی حەوت، ئەنجوومەنی وەزیرانی کوردستان چاوەڕوان دەکات مووچەی مانگی هەشت و مانگەکانی دیکەش خەرج بکرێت. لە بەرامبەردا کوردستان ئامادەیی خۆی دووپات دەکاتەوە بۆ بەردەوامبوون لەسەر جێبەجێکردنی پابەندییەکانی خۆی بۆ دابینکردنی مووچە و شایستەکانی مووچەخۆران.