ئەو پیاوەی ئەندامی نێرینەی بڕابوو بۆی لکێندرایەوە

ئاڤا نیوز

ئەو پیاوەی ئەندامی نێرینەی بڕابوو، نەشتەرگەری بۆ کراو و ئەندامەکەی بۆ لکێنرایەوە، بەپێی گوتەی ئەو پزیشکەی نەشتەرگەرییەکەی کردووە، باری تەندروستی جێگیرە.

چیرۆکی سەرەکی: ئێوارەی دوێنێ یەکشەممە،  لە گەڕەکی شەهیدانی قەزای کەلار، بەهۆی کێشەیەکی خێزانی، ژنێک بە چەقۆ ئەندامی نێرینەی پیاوەکەی بڕی.

لێدوانی فەرمی: د. هەڵۆ ئۆرمزیار، پسپۆڕی نەشتەرگەری گورچیلە و میزەڕۆ و لاوازی سێکسی، بە ئاڤای گوت: ئەو کەسە ئەندامی نێرینەی لە بنا بڕابوو، دوای ئەوەی ڕەوانەی نەخۆشخانەی کەلار کرابوو، فریاگوزاری سەرەتایی  بۆ کرابوو، دواتر ڕەوانەی نەخۆشخانەی شار لە سلێمانی کراوە.

 د. هەڵۆ ئۆرمزیار ئەمانەشی وت:

٠ دوای کاتژمێر 12ـی شەوی ڕابردوو، ئێمە تیمی نەشتەرگەری گورچیلە و میزەڕۆ دەستمان بە نەشتەرگەری کرد و تا نزیکی کاتژمێر پێنجی بەیانی بەردەوام بووین و ئەو بەشەی ئەندامی نێرینەی بڕابوو بەبەشی سەرەوەمان لکاندەوە.

٠ دواتر تیمی نەشتەرگەری جوانکاری خەریکی لکاندنی هەندێ بۆری ورد بوون و تا نزیکەی کاتژمێر هەشتی بەیانی بەردەوام بوون.

٠ نەشتەرگەرییەکە دەگمەنە و قورسە، پێویستی بە تیمی تایبەت هەیە، توانیمان بەشێوەیەکی ورد ئەو بەشەی بڕابوو بە بەشی سەرەوەی بلکێنینەوە، نەشتەرگەرییەکە سەرووی هەشت کاتژمێر خایاند.

٠ نەخۆشەکە باری تەندروستی جێگیرە، بەڵام دەبێت لەژێر چاودێری پزیشكی بمێنێتەوە.

٠ لە چەند ڕۆژی داهاتوو ئەنجامەکەی دیار دەبێت تا چەند ئەو کەسە کیشەی بۆ دروست دەبێت.

٠ بەشیوەی گشتی ئەم جۆرە کەیسانە دووچاری چەند کێشەیەک دەبنەوە لەوانە کێشەی میزکردن، کێشەی ڕەشبوونەوەی ئەندامی نێرینە، کێشەی ڕەقبوون و توانای ئەنجامدانی سێکس.

٠ ئەگەر لکاندنەکە ڕەش نەبێت و تووشی ڕەتکردنەوە نەبێت، کێشەکانی دیکەی وەک میزکردن و توانای سێکسی چارەسەرییان هەیە.