ئەپیكۆر: گەشبینین كێشەی نەوتی هەرێمی کوردستان چارەسەر دەكرێت

ئاڤا نیوز

کۆمەڵەی پیشەسازی نەوتی کوردستان " ئەپیکۆر" گەشبینە بە سەردانەکەی سەرۆکوەزیرانی عێراق بۆ ئەمریکا، دەشڵێت "کێشەی هەناردەکردنەوەی نەوتی هەرێمی کوردستان چارەسەر دەکات".

ڕاگەیێنراوی فەرمی: ئەپیکۆر ڕایگەیاند: سەردانی محەممەد شیاع سوودانی سەرۆکوەزیرانی عێراق بۆ ئەمریکا و کۆبوونەوەی لەگەڵ جۆ بایدن سەرۆکی ئەمریکا، دەرفەتێکە بۆ گەیشتن بە رێککەوتنێک لەبارەی هەناردەی نەوت لەرێگەی بۆری نەوتی عێراق - تورکیا، گەشبینین بەوەی ئەو کۆبوونەوە باڵایە وادەکات هەمووان دەستوبرد بکەن، بۆ ئەوەی دەستبکرێتەوە بە بەرهەمێنانی تەواو و هەناردەی نەوتی هەرێمی کوردستان.

وێنە گەورەکە: بەهۆی ڕاگرتنی هەناردەی نەوتی هەرێمی کوردستانەوە، ڕۆژانە بازاری وزەی جیهان نزیکەی 400 هەزار بەرمیل نەوت لەدەست دەدات، ئەمەش بووەتە هۆی بەرزبوونەوەی نرخی نەوت لە جیهان، جگە لەوەش زیانی 14.5 ملیار دۆلاری بە داهاتی عێراق گەیاندووە.

لێدوانی فەرمی: مایڵز کاگینز، گوتەبێژی ئەپیکۆر ڕایگەیاند: "ئەندامەکانی ئەپیکۆر بەپەرۆشن بۆ گەیشتن بە چارەسەرێکی هاوبەش و دەستپێکردنەوەی هەناردەی نەوت لەڕێگەی بۆری نەوتی عێراق - تورکیا".

باکگراوند: زیاتر لە ساڵێکە، هەناردەی نەوتی هەرێمی کوردستان لە ڕێگەی بۆری نەوتی عێراق – تورکیا، دوای سکاڵایەکی عێراق لەسەر تورکیا و بەبڕیاری دادگەی نێوبژیوانی پاریس ڕاگیراوە.