نرخی نەوت دابەزی و زێڕ و بیتکۆین بەرزبوونەوە

ئاڤا نیوز

ئەمڕۆ نرخی نەوت لە بازاڕەكانی جیهاندا زیاتر لە دۆلارێك دابەزی، زێڕ و بیتکۆینیش بەرزبوونەوە.

وێنە گەورەکە: بەهۆی گرژییەکانی ڕۆژهەڵاتی ناوەڕاست و ململانێکانی نێوان ئێران و ئیسرائیل کاڵا جیهانییەکان لە بەرز و نزمی بەردەوامدان.

چیرۆکی سەرەکی: زیاتر لە مانگێكە نرخی نەوت لە بەرزبوونەوەدایە، بەڵام ئەمڕۆ نرخی یەك بەرمیل نەوت زیاتر لە دۆلارێك دابەزی، شارەزایانیش دەڵێن زیاتر دادەبەزێت، زێڕیش تادێت بەرزتر دەبێتەوە، هەروەها بیتکۆین لە هەڵبەز و دابەزینی گەورەو بەردەوامدایە.

ژمارەكان وادەڵێن: تاوەکو ئامادەکردنی ئەم هەواڵە نرخەکان بەمشێوەیە بوون:

نەوت: 
- نرخی یەك بەرمیل نەوتی برێنت 90 دۆلار و 30 سەنتە.
- نرخی یەك بەرمیل نەوتی ئۆپیك 89 دۆلار و 69 سەنتە.
- نرخی یەك بەرمیل نەوتی خاوی تێكساس 85 دۆلار و 25 سەنتە.

زێڕ: یەك ئۆنسە زێڕ بە دوو هەزار و 355 دۆلارە 

- مسقاڵێك زێڕی عەیار (24) بە 555 هەزار دیناری عێراقییە.
- مسقاڵێك زێڕی عەیار (21) بە 490 هەزار دیناری عێراقییە.
- مسقاڵێك زێڕی عەیار (18) بە 425 هەزار دیناری عێراقییە.

بیتکۆین: دراوی ئەلیکترۆنی بیتکۆین کە لە چەند ڕۆژی ڕابردوودا و بەتایبەت بەهۆی هێرشی ئێران بۆ سەر ئیسرائیل زیاتر لە 12 هەزار دۆلار دابەزی، لە دوێنێوە دەستی بە بەرزبوونەوە کردووە، تاوەکو ئێستا شەش هەزار دۆلار بەرزبووەتەوە و ئێستا یەک بیتکۆین بە 66 هەزار و 500 دۆلارە.