لە کۆڕێ شەڕەتەقە ڕوودەدات و تەقەکاران ڕادەکەن

ئاڤا نیوز 

 

چەند داواکراوێکی ڕووداوەکەی گوندی شەوەک لە کۆڕی تەقە لە هێزە ئەمنییەکان دەکەن و دواتر ڕادەکەن؛ سەرچاوەیەکی ئەمنیش ڕایگەیاند، دۆخەکە سەقامگیرە و هیچ ئاڵۆزییەک نەماوە.

 

وێنە گەورەکە: هێزە ئەمنییەکان بۆ دەستگیرکردنی چەند داواکراوێک دەچنە شارەدێی کۆڕێ لە سنووری پارێزگای هەولێر، بەڵام خۆیان ڕادەستی هێزە ئەمنییەکان ناکەن و تەقە دەکەن.

 

لێدوانی فەرمی: حامید کاکەیی، قایمقامی پیرمام بە ئاڤا نیوزی گوت: "هێزە ئەمنییەکان ویستوویانە چەند داواکراوێک لە کۆڕێ دەستگیر بکەن، خۆیان ڕادەست نەکردووە و تەقەیان لە هێزە ئەمنییەکان کردووە".

 

ئەوەش بزانە: لەو ڕووداوە، هیچ کەسێک بریندار نەبووە و هیچ کام لە داواکراوەکانیش دەستگیرنەکراون و ڕایانکردووە.

 

زانیاریی تایبەت: ئاڤا نیوز زانیویەتی، شەڕەتەقەکە پەیوەندی بە شەڕەکەی ڕۆژانی ڕابردووی گوندی شەوکەوە هەیە و داواکراوەکان تۆمەتباری ئەو شەڕە بوون.