هێلیکۆپتەرەکەی سەرۆکی ئێران تووشی ڕووداو بوو

ئاڤا نیوز 

 

ئاژانسی تەسنیمی ئێران ئاشکرای دەکات هێلیکۆپتەری سەرۆککۆماری ئێران تووشی ڕووداوێک بووە، بەڵام سەرۆککۆمار خۆی سەلامەتە، هەرچەندە تاوەکو ئێستا تیمەکانی فریاگوزاری بەدوای شوێنەکەیدا دەگەڕێن. 

 

چیرۆکی سەرەکی: هێلیکۆپتەرەکە تووشی نیشتنەوەیەکی سەخت بووە، لەکاتێکدا کە بەهۆی تێکچوونی کەشوهەواوە بەناچاری ویستوویەتی بنشێتەوە، تیمە فریاگوزارییەکان چوونەتە شوێنی ڕووداوەکە؛ دوای ئەوەش یەکێک لە ئەندامی تیمەکەی سەرۆککۆماری ئێران پەیوەندی بە تیمەکانی ناوەندەوە کردووە و هیوایەکی زۆر هەیە سەلامەت بن.

 

زانیاریی بەدەستهاتوو: بەپێی هەواڵی ئاژانسی تەسنیمی ئێران، ڕۆژی یەکشەممە 19-05-2024 هێلیکۆپتەرێک کە ئیبراهیم ڕەئیسی، سەرۆککۆماری ئێرانی هەڵگرتبوو تووشی ڕووداو بووە.

 

ئەوەی لەبارەیەوە دەگوترێت: کاروانی ئیبراهیم رەئیسی، سێ هێلیکۆپتەر بوون و دوو لەوانە بە سەلامەتی گەیشتوونەتە شوێنی مەبەست، سەرۆککۆمار، وەزیری دەرەوە و ژمارەیەک بەرپرسی دیکەی لەگەڵدا بووە.

 

زانیاریی زیاتر: هێلیکۆپتەرەکەی سەرۆککۆماری ئێران نیشتووەتەوە، بەڵام هێلیکۆپتەرەکەی ونە و تیمەکانی فریاگوزاریی ئێران دەستیان بە گەڕان بەدوای هێلیکۆپتەرەکەی سەرۆککۆماری ئێران کردووە.