بێگەرد تاڵەبانی: عەلوەی هاوچەرخی ئاکرێ هەلی کار دەڕەخسێنێت

ئاڤا نیوز

 

وەزیری کشتوکاڵی هەرێمی کوردستان پڕۆژەی عەلوەی هاوچەرخی ئاکرێ بە گرنگ وەسف دەکات و دەڵێت، هەلی کاری زۆر دەڕەخسێنێت.

 

وێنە گەورەکە: ئەمڕۆ لە ئاکرێ سەرۆکوەزیران بارزانی، بەردی بناغەی دووەم گەورەترین عەلوەی لەسەر ئاستی هەرێمی کوردستان و عێراق دانا کە پڕۆژەکە بە گوژمەی 22ملیۆن دۆلار لەسەر ڕووبەری 245 هەزار مەتر دووجا دروست دەکرێت.

 

لێدوانی فەرمی: بێگەرد تاڵەبانی، وەزیری کشتوکاڵ و سەرچاوەکانی ئاوی هەرێمی کوردستان بە ئاڤا نیوزی ڕاگەیاند، پڕۆژەکە ستراتیژییە و ناوەندیی ساغکردنەوەی بەروبوومی کشتوکاڵی جووتیارانە لە ناوچەکە.

 

خاڵی ئەرێنی: ئەم پڕۆژەیە هەلی کار بۆ دانیشتووانی ناوچەکە دەڕەخسێنێت و هۆکارێک دەبێت بۆ گواستنەوەی بەروبوومە کشتوکاڵییەکان و بەبازاڕکردنیان. 

 

لەلایەکی دیکەوە: لەبارەی هەناردەکردنی بەروبوومە کشتوکاڵییەکانەوە، وەزیری کشتوکاڵ جەخت لە هەوڵەکانیان دەکاتەوە و ئاماژە بەوە دەکات، لیژنەیەکی هاوبەشیان هەیە لە نێوان وەزارەت و نووسینگەی سەرۆکوەزیران کە کار لەسەر بەبازاڕکردنی ئەو بەرهەمانە دەکەن.