عێراق دەست بە دابەشکردنی مووچە دەکات

ئاڤا نیوز

 

سبەی یەکشەممە وەزارەتی دارایی عێراق دەست بە پارەدارکردنی وەزارەت و فەرمانگەکانی بۆ مانگی حوزەیران دەکات، لە هەرێمی کوردستانیش لیستی مووچەخۆران ئامادەیە و ڕەوانەی بەغدا دەکرێت. 

 

بۆچی گرنگە: مووچەخۆرانی هەرێمی کوردستانیش چاوەڕێن دوای ناردنی لیستی ناوەکانیان، بەغدا مووچەکانیان ڕەوانە بکات.

ڕاگیێنراوی فەرمی: وەزارەتی دارایی و ئابووریی عێراق، بڵاوی کردەوە، کە ڕۆژی شەممە 22-06-2024، دەست بە دابەشکردنی مووچەی مانگی شەشی فەرمانبەرانی عێراق دەکرێت و پارە ڕەوانەی بانکەکان دەکەن.

 

لەلایەکی دیکەوە: سەرچاوەیەک لە وەزارەتی دارایی و ئابووریی هەرێمی کوردستان بە ئاڤا نیوزی گوت: "پێشتر وەزارەتەکان ئاگادارکراونەتەوە لە 10ـی مانگ لیستی ناوەکانمان بۆ بنێرن، بەڵام لەبەر پشووی جەژن ئەم مانگە دواکەوت، لەگەڵ دەستپێکی دەوام لیستەکان دەنێرن و ئێمەش ڕاستەوخۆ بۆ بەغدای دەنێرین،  لیستی مووچەی مانگی شەشی هێزە ئەمنییەکانیش لەگەڵ لیستی فەرمانبەران بۆ بەغدا ڕەوانە دەکات".