سێ بەرهەمی دیکەی خۆماڵی هاوردەی ئیمارات دەکرێن

ئاڤا نیوز

 

 وەزارەتی کشتوکاڵی ڕایگەیاند، لە ماوەی داهاتوودا بەرهەمی هێلکە، مریشک و گۆشتی سوور هەناردەی دەرەوەی هەرێمی کوردستان دەکرێن.

 

وێنە گەورەکە: کابینەی نۆیەمی حکومەتی هەرێمی کوردستان لەگەڵ دەستبەکاربوونی، سیاسەتی زیادکردنی بەرهەمی خۆماڵی و بەرزکردنەوەی ئاستی هەناردەکردنی گرتووەتەبەر.

 

لێدوانی فەرمی: هیوا عەلی، بەرپرسی ڕاگەیاندنی وەزارەتی کشتوکاڵی هەرێمی کوردستان بە ئاڤا نیوزی ڕاگەیاند: "ئێمە خەرکی ڕێکارەکانین بۆ ئەوەی بەرهەمی خۆماڵی بنێرینە وڵاتانی دەرەوە، لەگەڵ ئیمارات لە هەوڵداین بۆ ئەوەی بگەینە ڕێککەوتن بەمەبەستی هەناردەکردنی گۆشتی سوور، مریشک و هێلکە بۆ ئەو وڵاتە.

 

زانیاریی زیاتر: هیوا عەلی ئەوەشی بە ئاڤا نیوز گوت، خواست لەسەر بەرهەمەکانی ناوخۆی هەرێمی کوردستان زۆرە، ئیماراتیش تا ڕادەیەک بەرهەمەکانیان بەدڵە.

 

ئەوەی پێویستە بیزانیت:  ئەمە یەکەمجار نییە کار بۆ هاوردەکردنی بەرهەمی خۆماڵی بکرێت، لە سەرەتای کابینەی نۆیەمدا هەر یەک لە بەرهەمەکانی سێو، پەتاتە، هەنگوین هاوردە کراون.