ناوی سێ یەکەمەکانی هەرێمی کوردستان ڕەوانەی بەغدا دەکرێن

ئاڤا نیوز

 

وەزارەتی خوێندنی باڵا و توێژینەوەی زانستی ڕایگەیاند، بە واژۆی وەزیری خوێندنی باڵا ناوی سێ یەکەمەکانی زانکۆ و پەیمانگاکان ڕەوانەی وەزارەتی دارایی کراوە بۆ ئەوەی بە مەبەستی دامەزراندن ڕەوانەی بەغدا بکرێت.

 

ڕاگەێنراوی فەرمی: بە نووسراوی ژمارە (13001)، لە ڕۆژی 14-07-2024، بە واژۆی وەزیری خوێندنی باڵا، ناوی سێ یەکەمەکانی زانکۆ حکومییەکان کە 12 هەزار و 286 قوتابین، دەرچووی ساڵانی خوێندنی 2017-2018 تاوەکو 2022-2023 ئاراستەی وەزارەتی دارایی و ئابووری هەرێمی کوردستان کراوە، تاوەکو ئەوان بۆ بەغدای بنێرن.

 

لەلایەکی دیکە: ئەنجوومەنی گشتیی ڕاژەی فیدراڵی ئەمڕۆ یەکشەممە 14-07-2024 دامەزراندنی 66 لە سێ یەکەمەکان لەسەر میلاکی وەزارەتی خوێندنی باڵا و توێژینەوەی زانستی بە ناونیشانی یاریدەدەری ئامار پەسەند کرد، هاوکات دامەزراندنی 305 دەرچوو لە پسپۆرییە جۆراوجۆرەکان لە سێ یەکەمەکان و هەڵگرانی بڕوانامەی باڵا لەسەر میلاکی ئەو لایانانەی کە پێویستیان بەو پسپۆریانە هەیە.

 

بۆچی گرنگە: لە هەرێمى کوردستان، ساڵانى ڕابردوودا توانراوە سێ یەکەمەکانى ساڵانى (2015-2016) و (2016-2017) دابمەزرێنرێن کە ژمارەیان (2842) کەس بوو، ئەم هەنگاوەی ئێستای وەزارەتی خوێندنی باڵا هەوڵێکە بۆ دامەزراندنی ئەوانەی تاوەکو ئێستا دانەمەزراون.