بە هۆی مێشوولەوە تایەکی مەترسیدار لە پێنج پارێزگای ئێران بڵاودەبێتەوە

ئاڤا نیوز  

یاریدەدەری وەزیری تەندروستی ئێران ڕایگەیاند، تایەک لە ڕێگەی مێشوولەوە لە پێنج پارێزگای ئێران بڵاوبووەتەوە.

وێنە گەورەکە: مێشوولەی Aedes aegypti، بە مێشوولەی تای زەرد یاخود میسری ناسراوە، ڤایرۆسی تای زەرد و خوێنبەربوون دەگوازێتەوە و لە ئەفریقا سەرچاوەی گرتووە، دواتر لە سەرانسەری ناوچە گەرمەکاندا بڵاوبووەتەوە.

بڵاوکراوەی فەرمی: حوسێن فەرشیدی، یاریدەدەری وەزیری تەندروستی ئێران پشتڕاستی کردەوە، مێشوولەی Aedes aegypti  هەڵگری تایەکی مەترسیدار و گوازراوەیە، لە پێنج پارێزگای ئێران پشتراستکراوەتەوە و ئێستا لە 40 شاری ئێران بڵاوبووەتەوە، هەروەها ئەو مێشوولانەی لە باشوور دۆزراونەتەوە خێراتر لە مێشوولەکانی باکوور بڵاودەبنەوە.

لە لایەکی دیکەوە: شەهنام عەرشی، سەرۆکی ناوەندی بەڕێوەبردنی نەخۆشییە درمیەکان لە وەزارەتی تەندروستی ئێران ڕایگەیاند: لەوانەیە مێشوولەکە ببێتە هۆی چوار نەخۆشی: خوێنبەربوون، تای زەرد، چیکۆنگونیا و زیکا، تا ئێستاش هیچ ڤاکسینێک بۆ هیچ کام لەم نەخۆشیانە نییە.